Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : भारतीय जनता पक्षाच्या राज्य कार्यकारिणीत छत्रपती संभाजीनगर जिल्ह्याला कुठलेही महत्त्वाचे पद मिळालेले नाही. शिरीष बोराळकर यांना सरचिटणीसपद मिळेल, अशी चर्चा होती. आ. संजय केणेकर यांना सरचिटणीस केले जाईल, अशी अपेक्षा होती. मात्र ते आमदार असल्यामुळे संधी मिळाली नाही. इद्रीस मुलतानी यांची अल्पसंख्याक मोर्चा अध्यक्षपदी नियुक्ती करून तेवढे कार्यकारिणीत मानाचे स्थान मिळाले आहे.
प्रदेशाध्यक्ष रवींद्र चव्हाण यांनी मंगळवारी (२४ फेब्रुवारी) राज्य कार्यकारिणीत मोठे फेरबदल केले. संजय कौडगे यांना संघटनमंत्री पदावरून सरचिटणीस होण्याची अपेक्षा होती. मात्र उपाध्यक्षपदावर बोळवण करण्यात आली. छत्रपती संभाजीनगर महापालिका पदाधिकारी निवडीत ढवळाढवळ केल्याचा फटका त्यांना बसल्याची चर्चा आहे. याशिवाय त्यांच्या विरोधात अनेक तक्रारीही होत्या. त्यामुळेच त्यांना संघटनेत दुय्यम दर्जाचे पद देण्यात आल्याची चर्चा आहे. राज्य कार्यकारिणीवर एकूण ४३ जणांना घेण्यात आले आहे. मात्र मराठवाड्याला एकही सरचिटणीस पद देण्यात आलेले नाही. तीन उपाध्यक्ष व दोन चिटणीसपदांसह अल्पसंख्याक मोर्चा व एससी मोर्चा अध्यक्षपद तेवढे मिळाले आहे. दरम्यान, पक्षाचे राज्य कार्यकारिणीत संघटनमंत्री अद्याप कुणालाही केलेले नाही. संघाच्या परंपरेतील पदाधिकारी या पदावर नियुक्त केला जाईल, असे सांगितले जात आहे.
