छत्रपती संभाजीनगर (मेट्रोपोलिस पोस्ट वृत्तसेवा) : महागड्या मोबाइल विक्रीच्या व्यवसायात मोठा नफा मिळत असून, त्यात गुंतवणूक केल्यास जास्त परतावा देण्याचे आमिष शहरातील व्यावसायिकाने दाखवून चौघांना ३८ लाख रुपयांनी गंडा घातला. पुंडलिकनगर पोलिसांनी या व्यावसायिकाविरुद्ध गुन्हा दाखल करून त्याच्या पत्नी, आई आणि बहिणीलाही गुन्हा दाखल करून अटक केली आहे.
पोलीस निरीक्षक अशोक भंडारे यांनी पत्रकारांना घटनेची माहिती दिली. श्रीकांत बाळासाहेब मलठणकर, त्याची पत्नी मनिषा सुरेश बागूल, आई रेखा बाळासाहेब मलठणकर, बहीण स्वाती बाळासाहेब मलठणकर (सर्व रा. शिवाजीनगर) अशी गुन्हा दाखल झालेल्यांची नावे आहेत. धीरज रवींद्र सोनवणे (रा. सारा, राजनगर) यांनी या प्रकरणात तक्रार दिली आहे. तक्रारीनुसार, मलठणकर याच्याशी मोबाइल दुरुस्तीच्या कामातून धीरज यांची ओळख झाली होती. श्रीकांतने आपण ॲपल आणि सॅमसंगचे फोन आयात करून भारतीय बाजारपेठेत विकतो आणि त्यातून मोठा नफा मिळवतो, असे सांगत या व्यवसायात पैसे गुंतवल्यास ३० ते ४० दिवसांत मोठा परतावा मिळेल, असे आमिष दाखवले.
सोनवणे यांनी स्वतः आणि त्यांच्या पत्नीच्या नावे मिळून सुमारे १२ लाख २५ हजार रुपये गुंतवले. त्यांना केवळ ४ लाख ६० हजार रुपये परत मिळाले. त्यांचे ६ लाख ६५ हजार रुपये मलठणकरने दिलेच नाहीत. याशिवाय सुरेश संतोष पवार यांना १६ लाख ५१ हजार, राजू सुरेशराव नगरकर यांना ११ लाख ९२ हजार आणि राजेंद्र सुंदरलाल ज्योतिषी यांना ३ लाख ४९ हजार रुपयांनी मलठणकरने गंडा घातला. फसवणुकीचे व्यवहार श्रीकांतची पत्नी मनीषा (उर्फ स्वरा) सुरेश बागूल, स्वाती मलठणकर, रेखा मलठणकर यांच्या बँक खाते आणि फोन पे वरून झाले. त्यामुळे त्यांच्याविरुद्धही गुन्हा दाखल करण्यात आला. अधिक तपास पोलीस उपनिरीक्षक वर्षा काळे करत आहेत.
