पैठण (मेट्रोपोलिस पोस्ट वृत्तसेवा) : पैठण तालुक्यातील बालानगर येथे दारू पिल्यानंतर दोन मित्रांत वाद होऊन एकाने दुसऱ्याचा दगडाने ठेचून खून केला. ही खळबळजनक घटना सोमवारी (२३ फेब्रुवारी) सकाळी सातला समोर आली. अहेमद जाफर पठाण (वय ८४, रा. बालानगर) असे खून झालेल्या व्यक्तीचे नाव असून, केशव छगन चव्हाण (रा. तांबे डोणगाव, ता. पैठण) असे मारेकऱ्याचे नाव आहे.
केशवविरुद्ध पैठण एमआयडीसी पोलिसांनी आमीन अहेमद पठाण (वय २७, रा. बालानगर ता. पैठण) यांच्या तक्रारीवरून खुनाचा गुन्हा दाखल केला आहे. आमीन हे पत्नी रुक्सारासह राहतात. त्यांचे वडील अहेमद जाफर पठाण, आई हुजरा बेगम अहेमद पठाण गावाशेजारी नवीन खळवाडी येथे राहत होते. २३ फेब्रुवारीला सकाळी ७ च्या सुमारास आमीन हे बदनापूरला असताना त्यांचा मित्र जावेद शेखने कॉल करून सांगितले की, तुझे वडील बालानगर- ढोरकीन रोडवरील देशी दारू दुकानाच्या बाजूला शेतात जखमी अवस्थेत पडलेले आहेत. त्यानंतर आमीन यांनी भाऊ इस्माईल अहेमद पठाण याला माहिती दिली व लगेचच बालानगरकडे यायला निघाले.
सकाळी साडेआठला ते बालानगरला आले. त्यांचे वडील अहेमद जाफर पठाण जखमी अवस्थेत पडलेले होते. त्यांच्या डाव्या भुवईच्या वर, डाव्या डोळ्याखाली गंभीर जखमा दिसत होत्या. चेहरा पूर्ण रक्ताने माखलेला दिसत होता. डोक्याजवळ रक्त लागलेला दगड पडलेला दिसत होता. आमीन यांनी पोलिसांना कळवले. काही वेळात पोलीस तेथे आले. पोलिसांनी पाहणी केल्यानंतर अहेमद यांचा मृतदेह पैठणच्या सरकारी रुग्णालयात हलविण्यात आला. तिथून छत्रपती संभाजीनगरच्या घाटी रुग्णालयात उत्तरीय तपासणीसाठी मृतदेह पाठविण्यात आला. उत्तरीय तपासणीनंतर मृतदेह रात्री बालानगरला आणून अंत्यविधी करण्यात आले.
पोलीस चौकशीत समोर आला खून...पोलिसांनी मृत्यूची चौकशी सुरू केली. त्यातून समोर आले, की २२ फेब्रुवारीला सायंकाळी सातच्या सुमारास अहेमद पठाण घरातून बाहेर पडले. केशव छगन चव्हाण (रा. तांबे डोणगाव, ता. पैठण) याच्यासोबत बालानगर- ढोरकीन रोडलगत युसूफ पठाण यांच्या शेतात दोघे दारू पिले. दारू पिताना त्यांच्यात काहीतरी वाद झाला. या वादातून केशव चव्हाणने अहेमद यांच्या यांच्या डाव्या भुवईच्यावर व डाव्या डोळ्याखाली दगडाने मारून गंभीर जखमी केले. यात अहेमद यांचा मृत्यू झाला. त्यावरून पोलिसांनी केशव चव्हाणविरुद्ध गुन्हा दाखल केला आहे. अधिक तपास पोलीस निरीक्षक ईश्वर जगदाळे करत आहेत.
