छत्रपती संभाजीनगर (मेट्रोपोलिस पोस्ट वृत्तसेवा) : रहाळपट्टी तांडा, जटवाडा येथील लाचखोर ग्रामसेवक राजोबा विठोबा काथार (५०, रा. वसंतनगर, जाधववाडी) अखेर लाचलुचपत प्रतिबंधक विभागाच्या (एसीबी) जाळ्यात अडकला. पाणीपुरवठा आणि घनकचरा व्यवस्थापन कामाचे बिल मंजूर केल्याचा मोबदला म्हणून त्याने कंत्राटदाराकडून १० हजार रुपयांची लाच घेतली. टीव्ही सेंटर चौकातील एका हॉटेलमध्ये लाचेची रक्कम स्वीकारताच काथारवर एसीबीच्या पथकाने झडप घातली.
कंत्राटदाराने रहाळपट्टी येथे ग्रामनिधी योजनेंतर्गत पाणीपुरवठा आणि घनकचरा व्यवस्थापनाचे काम केले होते. या कामाचे बिल ग्रामसेवक काथारने मंजूर करून कंत्राटदाराला अदा केले. बिल अदा केल्याचे बक्षीस म्हणून २० हजार रुपयांच्या लाचेची मागणी केली. कंत्राटदाराला लाच देण्याची इच्छा नसल्याने एसीबीकडे तक्रार केली. एसीबीने लाचेच्या मागणीची पडताळणी करून केली. पडताळणीत काथारने तडजोडीअंती १० हजार रुपये मान्य केल्याचे स्पष्ट झाले. त्यानुसार, मंगळवारी टीव्ही सेंटर येथील एका हॉटेलमध्ये सापळा रचण्यात आला.
तिथे कंत्राटदाराकडून १० हजार रुपयांची लाच घेताच काथारला एसीबीच्या पथकाने रंगेहात पकडले. काथारच्या जाधववाडीतील घराची झडती घेण्याच्या प्रक्रियेसह सिडको पोलीस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. ही कारवाई पोलीस अधीक्षक माधुरी केदार-कांगणे, उपअधीक्षक राजीव तळेकर यांच्या मार्गदर्शनाखाली पोलीस निरीक्षक शांतीलाल चव्हाण, अंमलदार रवींद्र काळे, अशोक नागरगोजे, विलास चव्हाण आणि रामेश्वर ताठे यांच्या पथकाने केली. अधिक तपास पोलीस निरीक्षक राजू नागलोत करीत आहेत.
