छत्रपती संभाजीनगर (मेट्रोपोलिस पोस्ट वृत्तसेवा) : ओरिसावरून छत्रपती संभाजीनगरमध्ये गांजा आणणणाऱ्या तिघांच्या मुसक्या शहर गुन्हे शाखेने आवळल्या आहेत. त्यांच्याकडून पावणेपाच किलो गांजा, ट्रक, मोबाइल, रोकड असा सुमारे १६ लाख २० हजार रुपयांचा मुद्देमाल जप्त केला. ही कारवाई छत्रपती संभाजीनगर तालुक्यातील करोडी शिवारात चामुंडा एंटरप्रायजेसमध्ये करण्यात आली.
शेख मोहम्मद खालीद शेख नईम (रा. सादातनगर, सातारा परिसर), शेख अकील शेख सलीम (रा. जहागीरदार कॉलनी, रेल्वे स्टेशन, राजीवनगर) आणि मोहम्मद मन्सूर शेख (रा. सादातनगर, सातारा परिसर) पकडण्यात आलेल्या गांजा तस्करांची नावे आहेत. त्यांच्याविरुद्ध दौलताबाद पोलीस ठाण्यात गुन्हा दाखल करण्यात आला आहे. शेख अकील हा रेकॉर्डवरील गुन्हेगार असून, त्याला ऑगस्ट २०२४ मध्ये दोन वर्षांसाठी हद्दपार केले होते. ऑगस्ट २०२६ पर्यंत हद्दपार असतानाही तो शहरात आल्याचे समोर आले.
पोलीस उपनिरीक्षक संदीप काळे यांना गोपनीय माहिती मिळाली, की चामुंडा इंटरप्रायजेस येथे माल घेऊन आलेल्या ट्रकमध्ये गांजा आहे. त्यानुसार पोलिसांनी करोडी शिवारात छापा मारला. तेथे ट्रकची (एमएच १७ बीवाय ६९७४) झडती घेतली. चालकाच्या सिटमागील बॉक्समध्ये ४ किलो ८७३ ग्रॅम गांजा सापडला. ही कारवाई वरिष्ठ पोलीस निरीक्षक गजानन कल्याणकर यांच्या मार्गदर्शनाखाली पोलीस उपनिरीक्षक संदीप काळे, पोलीस अंमलदार संदीप तायडे, कैलास काकड, योगेश नवसारे, राहुल बंगाळे, अमोल मुगळे, शेख जुनेद, अक्षय नाटकर, सागर साळवे, तातेराव शिनगारे, दादासाहेब झारगड यांनी केली.
