छत्रपती संभाजीनगर (मेट्रोपोलिस पोस्ट वृत्तसेवा) : वाळूज औद्योगिक वसाहत परिसरातील तिसगाव चौफुलीजवळ नंदिनी राजू धिवरे (वय २०, रा. वडगाव कोल्हाटी, ता. छत्रपती संभाजीनगर) या तरुणीचा गादीत संशयास्पद स्थितीत मृतदेह आढळल्याने खळबळ उडाली आहे. हा प्रकार गुरुवारी (१९ फेब्रुवारी) रात्री १० च्या सुमारास समोर आला. पोलिसांनी सावत्र आई भारती उमेश साबळे (वय ३५) व वडील उमेश गोविंद साबळे (वय ४०, रा. वडगाव कोल्हाटी) यांना ताब्यात घेऊन कसून चौकशी सुरू केली आहे. मृत्यूचे नेमके कारण शवविच्छेदन अहवालानंतर स्पष्ट होणार आहे.
पोलीस सूत्रांनी दिलेल्या माहितीनुसार वृत्त असे, की वडगाव कोल्हाटी येथून कांबळे दाम्पत्य एका रिक्षाचालकाला आम्हाला तिसगाव फाटा येथे सोडा, असे सांगून निघाले होते. त्यांच्यासोबत एक मोठी गादी व काही सामान होते. गादी अत्यंत घट्ट व संशयास्पद गुंडाळलेली होती. ती अनपेक्षितपणे जड वाटल्याने रिक्षाचालकाला संशय आला. त्याने पोलिसांना कळवले. पोलीस उपनिरीक्षक प्रवीण पाथरकर, सहायक पोलीस निरीक्षक अरविंद शिंदे यांनी रिक्षा अडवली. पोलिसांनी गादी उघडून पाहिली असता त्यात तरुणीचा मृतदेह आढळल्याने त्यांनाही धक्का बसला. प्राथमिक चौकशीत वडिलांनी मुलीने गळफास घेतला असून, तिचा मृतदेह अंत्यसंस्कारासाठी घेऊन जात होतो, असा दावा केला आहे. 
ज्या पद्धतीने दाम्पत्य मृतदेह नेत होते आणि त्या आधीही त्यांनी त्याबाबत कुठे नोंद केलेली नसल्याने संशय बळावला आहे. पोलिसांनी मृतदेह घाटी रुग्णालयात शवविच्छेदनासाठी पाठवला आहे. दरम्यान, नंदिनी काही दिवसांपूर्वी प्रेमविवाह करून वडगाव कोल्हाटी येथे रूम भाड्याने करून राहत होती, असे समोर येत आहे. हा प्रकार खरंच आत्महत्या आहे की घातपात हे चौकशीनंतरच समोर येणार आहे.
.jpg)
.jpg)
.jpg)
.jpeg)
.jpeg)
.jpg)
