छत्रपती संभाजीनगरात मिरवणुकीत नाचण्यावरून चाकूहल्ला, दोन जण जखमी

शिवजयंती मिरवणुकीत अनेक ठिकाणी हाणामारी; ७५ मोबाइल, २० महिलांचे मंगळसूत्रेही लंपास

On 20 Feb 2026

छत्रपती संभाजीनगरात मिरवणुकीत नाचण्यावरून चाकूहल्ला, दोन जण जखमी

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : शहरात शिवजयंती उत्साहात साजरी झाली. परंतु काही ठिकाणी या मिरवणुकीला वादाचे तसेच चोरीच्या घटनांचे गालबोट लागले. क्रांती चौक परिसरात मिरवणुकीत नाचण्याच्या कारणावरून झालेल्या वादाचे रूपांतर हल्ल्यात झाले असून, चाकू हल्ल्यात दोन तरुण गंभीर जखमी झाले आहेत.

पोलिसांनी दिलेल्या माहितीनुसार, विटखेडा येथील रहिवासी शुभम दत्तात्रय गायकवाड (१८) आणि सिद्धांत कडूबा चव्हाण यांच्यावर अज्ञातांनी चाकूने वार केले. या हल्ल्यामुळे परिसरात एकच खळबळ उडाली. जखमींवर सध्या रुग्णालयात उपचार सुरू आहेत. केवळ नाचण्याच्या वादातून ही घटना घडली असून, रात्री उशिरापर्यंत शहरात इतर पाच ते सहा ठिकाणी किरकोळ हाणामारीच्या घटनांची नोंद झाली आहे. तर एका स्टेजवर घोषणा देताना दोन गट भिडल्याची घटना समोर आली होती.

मिरवणुकीत चोरटे मोकाट; मंगळसूत्र मोबाइल पळवले
शिवजयंती मिरवणुकीत झालेल्या अलोट गर्दीचा फायदा घेत चोरट्यांनी आपला हात साफ करून घेतला. क्रांती चौक परिसरातून तब्बल ७० ते ८० मोबाइल आणि जवळवास २० महिलांच्या गळ्यातील मंगळसूत्रे लंपास करण्यात आली आहेत. या प्रकरणी पोलिसांनी तत्काळ कारवाई करत दुचाकी, मंगळसूत्र आणि मोबाइल चोरीच्या संशयावरून पाच जणांना ताब्यात घेतले आहे. गर्दीच्या ठिकाणी कडेकोट बंदोबस्त असूनही चोरांनी घातलेल्या धुमाकूळामुळे पोलिसांच्या कामगिरीवर नागरिकांत तीव्र नाराजी व्यक्त होत आहे. पोलीस पुढील तपास करत आहेत.