किराडपुऱ्यात मोठी कारवाई : १२ लाख रुपयांच्या ३००० नशेच्या औषधी बाटल्‍या जप्त; हॉल, बेडरूम, किचन अगदी वॉशिंग मशीनमध्येही ठेवल्या होत्या बाटल्या, ४ जणांना अटक

छत्रपती संभाजीनगर (मेट्रोपोलिस पोस्ट वृत्तसेवा) : शहर पोलिसांकडून नशेच्या बाजारावर घाव घालणे सुरूच आहे. गुन्हे शाखेच्या पोलिसांनी किराडपुऱ्यातील रहेमानिया कॉलनीत ड्रग्ज तस्कराच्या घरावर छापा मारून १२ लाख रुपयांच्या ३ हजार नशेच्या औषधीच्या बाटल्‍या जप्त केल्या. हॉल, बेडरूम, किचन, अगदी वॉशिंग मशीनमध्येही बाटल्या ठेवलेल्या होत्या. त्या सर्व पोलिसांनी जप्त केल्या असून, रोकड आणि मोबाइलसह एकूण १२ लाख ४६ हजार ७०० रुपयांचा मुद्देमाल जप्त केला. या वेळी ४ तस्करांना अटक करण्यात आली आहेत. ही कारवाई मंगळवारी (३ फेब्रुवारी) रात्री साडेनऊच्या सुमारास करण्यात आली.

उबेदउल्ला अब्दुला खान (वय ३२, रा. रहेमानीया कॉलनी, राम मंदिराजवळ, किराडपुरा), शेख सोफीयान शेख नजीर (वय ३४, रा. गल्ली नं. २६, बायजीपुरा), अब्दुल नवीद खान अब्दुल समी खान (वय ३१, रा. गल्ली नं. १, खास गेट, जिन्सी पोलीस ठाण्याजवळ), शेख नावेद शेख हमीद (वय २५, रा. लेबर कॉलनी, कॅप्टन कलेक्शनजवळ, फाजलपुरा) अशी पकडण्यात आलेल्या तस्करांची नावे आहेत.  त्यांच्याविरुद्ध पोलीस उपनिरीक्षक अभिजीत चिखलीकर यांच्या तक्रारीवरून जिन्सी पोलिसांनी गुन्हा दाखल केला आहे.

मंगळवारी (३ फेब्रुवारी) सायंकाळी पावणेसातच्या सुमारास पोलीस उपनिरीक्षक प्रवीण वाघ यांना त्यांच्या गुप्त बातमीदाराकडून माहिती मिळाली, की उबेदउल्ला खानने त्याच्या राहत्या घरात नशा आणणाऱ्या औषधीच्या बाटल्या विकण्यासाठी लपवून ठेवल्या आहेत. त्यांनी ही माहिती शहर गुन्हे शाखेचे पोलीस निरीक्षक गजानन कल्याणकर यांना दिली. त्यांनी कारवाईचे आदेश दिले. त्यानंतर सहायक पोलीस निरीक्षक रविकांत गच्चे, पोलीस उपनिरीक्षक प्रविण वाघ व अर्जुन कदम, पोलीस अंमलदार राजेंद्र साळुंके, योगेश गुप्ता, योगेश नवसारे, विजय निकम, श्रीकांत काळे, मनोहर गिते, विक्रम खंडागळे, राजेश यदमळ, राहुल बंगाळे, जालींदर गोरे, महिला पोलीस अंमलदार माया माळी व मनिषा नरोडे यांचे पथक कारवाईसाठी निघाले. सर्व जण किराडपुऱ्यातील राम मंदिराजवळ गेले.

पायी चालत नॅशनल बेकरीपासून उजव्या बाजूला आत गल्लीत गेल्यावर उबेदउल्ला खान राहत असलेल्या दोन मजली इमारतीच्या पहिल्या मजल्याचा दरवाजा वाजवला. उबेदउल्लानेच दरवाजा उघडला. त्याच्या घराची झडती घेतली असता हॉलमध्ये नशेच्या औषधीचे १२ बॉक्स मिळून आले. त्यात एकूण १८०० बाटल्या मिळून आल्या. घरात शेख सोफीयान, अब्दुल नवीद, शेख नावेद बसलेले होते. ते सर्व जण उबेदउल्लाचे साथीदार असल्याचे चौकशीत समोर आले. तेही नशेच्या बाटल्या विक्री करत असल्याचे उबेदउल्लाने सांगितले. किचनमध्ये एकूण ४ बॉक्स आढळले. त्यात १००० बाटल्या होत्या. बेडरूममध्येही ४ बॉक्स दिसून आले. त्यात ६०० बाटल्या होत्या. बेडरूममधील वॉशिंग मशीनमध्ये ५० बाटल्या भिजत ठेवलेल्या दिसल्या. सर्व बाटल्या जप्त करण्यात आल्या. Codine Phosphate & Triprolidine Hydrochloride Syrup असे लेबल बाटल्यांवर होते. नशा आणणारे औषध डॉक्टरांच्या सल्ल्याशिवाय औषधी मात्रेपेक्षा जास्त आणि सतत अति प्रमाणातील सेवन केल्यास मानवी आरोग्यास घातक ठरते. उबेदउल्लाकडे १७०० रुपये रोख मिळून आले. सर्वांकडील मोबाइलही पोलिसांनी जप्त केले. अधिक तपास पोलीस अंमलदार नामदेव सुरडकर करत आहेत.