छत्रपती संभाजीनगरच्या शहर महिला काँग्रेसमध्ये चाललं काय?, आधीच गळती, त्यात अध्यक्षपदावरून भांडाभांडी!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : चांगल्या कार्यकर्त्या एक- एक करून पक्ष सोडून जात असताना दुसरीकडे छत्रपती संभाजीनगर शहरात महिला काँग्रेसच्या अध्यक्षपदावरून दोन नेत्यांमध्ये जोरदार जुंपलेली दिसत आहे. दिपाली मिसाळ आणि अनिता भंडारी अशी या दोन महिला नेत्यांची नावे असून, दोघींनीही पक्षाची महिला शहराध्यक्ष आपणच असल्याचा दावा केला आहे.

काही दिवसांपासून छत्रपती संभाजीनगर शहर महिला काँग्रेसला गळतीचे ग्रहण लागले आहे. सरोज मसलगे,  विजया भोसले, मीनाक्षी देशपांडे या सातत्याने चर्चेत राहणाऱ्या ज्येष्ठ कार्यकर्त्यांनी काही दिवसांपूर्वीच शहर कार्यकारिणीतील गोंधळाला कंटाळून पक्षाला रामराम केला होता. त्यानंतर पक्षाला सावरण्यासाठी काही दिवसांपूर्वी अखिल भारतीय महिला काँग्रेसच्या अध्यक्षा अलका लांबा यांनी छत्रपती संभाजीनगर शहर महिला काँग्रेसच्या पदाधिकाऱ्यांची यादी प्रसिद्ध केली होती.

त्यात अध्यक्षपदाची धुरा दिपाली मिसाळ यांच्याकडे सोपविल्याचे स्पष्ट झाले होते. मात्र, त्यानंतर लगेच अनिता भंडारी यांनी या यादीला आक्षेप घेत शहराध्यक्ष मीच असल्याचा दावा केला होता. मी पक्षाची एकनिष्ठ कार्यकर्ते असून, सदस्य नोंदणीतही सर्वाधिक पुढाकार मीच घेतला होता. असे असताना मला अध्यक्षपदावरून दूर करण्यात आले. हा माझ्यावरील अन्याय असून, यासंदर्भात मी लवकरच अलका लांबा यांची भेट घेणार असल्याचे भंडारी यांनी म्हटले आहे.

वैयक्तीक टिप्पणी सहन करणार नाही : दिपाली मिसाळ
दुसरीकडे आधी या पदावर राहिलेल्या आणि आता पुन्हा अध्यक्षपदी विराजमान झालेल्या दिपाली मिसाळ यांनी मात्र भंडारी यांचा दावा खोडून काढला. कुणी कितीही दावा केला तरी पक्षाच्या अखिल भारतीय अध्यक्षांनी शहराध्यक्षपदाची जबाबदारी माझ्यावर सोपवली आहे. आता कोण काय बोलते याच्याशी मला काही देणेघेणे नाही. अर्थात वैयक्तिक टिप्पणी मात्र मी सहन करणार नाही, अशा शब्दांत मिसाळ यांनी आपणच शहर महिला काँग्रेसच्या अध्यक्षा असल्याचे स्पष्ट केले.