पोलीस आयुक्तालयासमोरच भररस्त्यात तरुणीची विकृताकडून पाठलाग करून छेड, दामिनी पथकाने दाखवला हिसका!, छत्रपती संभाजीनगरातील घटनेने खळबळ

छत्रपती संभाजीनगर (मेट्रोपोलिस पोस्ट वृत्तसेवा) : भररस्त्यात विकृताने पायी जाणाऱ्या २५ वर्षीय विद्यार्थिनीची छेड काढल्याचा धक्कादायक प्रकार पोलीस आयुक्तालयासमोर बुधवारी (४ मार्च) सायंकाळी सहाच्या सुमारास घडली. दामिनी पथकाने धाव घेत विकृताला ताब्यात घेत सिटीचौक पोलिसांच्या ताब्यात दिले. चौकशीत त्याचे नाव सुनील मिसाळ (वय २३, रा. छावणी) असल्याचे समोर आले.

तरुणी शिक्षणासाठी शहरात आली असून, शहरातील एका महाविद्यालयात शिकते. शासकीय वसतिगृहात राहते. बुधवारी सायंकाळी साडेपाचला होस्टेलमधून चहा पिण्यासाठी मिलकॉर्नर परिसरात पायी येत होती. तिला एकटे पाहून विकृताने तिचा पाठलाग सुरू केला. तरुणीच्या ही बाब लक्षात आली नाही. मात्र नंतर त्याने अचानक तिच्या मागून जात अश्लीलरित्या स्पर्श केला. त्यामुळे तरुणी घाबरून गेली. तिने त्याला ढकलून देत जाब विचारला असता त्याने शिवीगाळ सुरू केली. त्याचवेळी तरुणीसोबत गैरप्रकार घडत असल्याचे पाहून तिच्या ओळखीच्या तरुणाने त्यांच्याकडे धाव घेतली. त्याने त्या विकृताला तरुणीपासून दूर होण्यास सांगितले.

त्यावर विकृताने त्या तरुणालाही धमकावले. भररस्त्यात हा प्रकार घडत असल्याने दामिनी पथकाला कळले. पथकाने लगेचच त्यांच्याकडे धाव घेत विकृताला ताब्यात घेतले. सिटी चौक पोलीस ठाण्यात या विकृताला आणले असता चौकशीत त्याचे नाव समोर आले. तो काही दिवस अहिल्यानगरमध्ये तर काही वेळेस छावणीत राहतो. भीक मागून परिसरात फिरतो. त्याने यापूर्वीही अनेक तरुणींची अशाप्रकारे छेड काढल्‍याची शक्यता नाकारता येत नाही. त्याच्याविरुद्ध तरुणीच्या तक्रारीवरुन विनयभंगाचा गुन्हा दाखल करण्यात आला असून, अधिक तपास पोलीस उपनिरीक्षक संतोष खरात करत आहेत.
महिलेला अश्लील शिवीगाळ
महिलेची शेजारी शिक्षकाने मोबाइलमध्ये व्हिडीओ रेकॉर्डिंग करत अश्लील शिवीगाळ केल्याप्रकरणी सातारा पोलिसांनी कैलास प्रल्हाद तवार (वय ५०, रा. सर्वेश्वर महादेव मंदिरासमोर, सातारा परिसर) यांच्याविरुद्ध बुधवारी (४ मार्च) गुन्हा दाखल केला आहे. ५१ वर्षीय महिलेने त्यांची तक्रार केली. रस्त्यावर फिरणाऱ्या कुत्र्यांची तक्रार महिलेने केल्यानंतर महापालिकेचे पथक तिथे आले. महिला या पथकाशी बोलत असताना शिक्षकाने व्हिडीओ रेकॉर्डिंगसह अश्लील शिवीगाळ केल्याचे महिलेने म्हणणे आहे.