छत्रपती संभाजीनगर (मेट्रोपोलिस पोस्ट वृत्तसेवा) : महापालिकेतील शिवसेनेचे गटनेते कोण होणार, हा पेच अखेर संपला आहे. मुंबईहून आलेल्या पक्षनिरीक्षक विलास पारकर यांनी नगरसेवकांची बैठक घेतली. त्यात त्र्यंबक तुपे यांच्या नावावर शिक्कामोर्तब करण्यात आले. त्यानंतर नगरसेवकांच्या सह्या घेऊन एकत्रित काम करण्याची तंबीही देण्यात आली.
त्र्यंबक तुपे यांना गटनेते करण्यासाठी मंत्री संजय शिरसाट आग्रही असून, उपमहापौर राजेंद्र जंजाळ यांचा त्यांना विरोध आहे. हा वाद वाढतच चालल्याने अखेर मुंबईवरून पक्षनिरीक्षकांना पाठविण्यात आले. बैठकीला खासदार संदिपान भुमरे, आ. प्रदीप जैस्वाल यांचीही उपस्थिती होती. मंत्री शिरसाट हे केजला गेल्यामुळे अनुपस्थित होते. नगरसेवकांच्या सह्या घेऊन गटनेतेपदाची प्रक्रिया सुरू करण्यात आली आहे. या वेळी काही नगरसेवकांनी आम्हाला गृहित धरू नका. आज जी बैठक झाली उपमहापौरपदाच्या वेळीही व्हायला हवी होती, अशी भूमिका मांडली. त्यावर पक्षनिरीक्षकांनी त्यांना सुनावत वाद टाळून एकत्र काम करण्याची सूचना केली. तुपेंच्या निवडीवर शिक्कामोर्तब झाल्याने जंजाळ यांना एक पाऊल मागे यावे लागले आहे.
स्थायी समितीचे सभापतीपद भाजप ताब्यात घेणारमहापालिकेत आता स्थायी समिती सभापती व विषय समिती सभापतींच्या निवडीच्या हालचाली सुरू झाल्या आहेत. स्थायी समितीचे सभापतीपद भाजप स्वतःकडे ठेवून घेणार आहे. स्थायी समितीसाठी १६ सदस्यांची निवड केली जाते. हे सदस्य आपला सभापती निवडतात. ५ पैकी ३ विषय समित्यांचे सभापतीपदही भाजपला स्वतःकडे ठेवायचे आहे. या सभापतींना महापालिकेत स्वतंत्र दालन दिले जाते. ९ प्रभाग समित्यांच्या सभापतीपदासाठीही भाजपने व्यूहरचना आखण्यास सुरुवात केली असून, त्यातील जास्तीत जास्त सभापतीपदे भाजपला स्वतःकडे हवी आहेत. भाजपने ५७ नगरसेवक आहेत. जास्तीत जास्त नगरसेवकांना पदे देऊन समाधानी करण्याचा प्रयत्न भाजपचा असणार आहे.
स्वीकृत सदस्यपदासाठी ३० जणांत स्पर्धासंख्याबळाच्या आधारे भाजपला ५ जणांना स्वीकृत सदस्य म्हणून महापालिकेत आणता येणार आहे. ज्यांना उमेदवारी मिळाली नाही अशा ७६ जणांना पक्षाने स्वीकृत सदस्य म्हणून संधी देण्याचा शब्द दिला आहे. यातील ३० जणांत स्पर्धा आहे. त्यातील कोणत्या ५ जणांना संधी मिळते, याकडे आता सर्वांचे लक्ष लागले आहे. भाजपला ५, एमआयएमला ३ आणि शिंदे गटाला १ स्वीकृत सदस्य महापालिकेत आणता येणार आहे. उर्वरित एका जागेसाठी इतर पक्षांचे एकत्रिकरण झाल्यास त्यांनाही आपला स्वीकृत सदस्य महापालिकेत आणता येईल.
ऐनवेळचा गोंधळ टाळणारमहापौर समीर राजूरकर यांनी काम शिस्तबद्धतेने व्हावे यासाठी खबरदारीची भूमिका घेतली असून, सर्वसाधारण सभेत ऐनवेळचे विषय आणून गोंधळ वाढू नये म्हणून नगरसेवकांना मांडायचा विषय आधी ८ दिवस आधीच आपल्याकडे सादर करण्याच्या सूचना केल्या आहेत.
