छत्रपती संभाजीनगर (मेट्रोपोलिस पोस्ट वृत्तसेवा) : हर्सूलजवळील जुना जकात नाक्याजवळ नियंत्रण सुटलेली सुसाट कार दुभाजकाला धडकल्यानंतर तीन वेळेस उलटून दोन तरुणांच्या अंगावर कोसळल्याची घटना ९ फेब्रुवारीच्या पहाटे दोनला घडली होती. गंभीर जखमी अनिकेत दिलीप निंबाळकर (वय २३, रा. लांजूळ, ता. खामगाव, जि. बुलडाणा) या विद्यार्थ्याचा जागेवरच मृत्यू झाला होता. त्याचा मित्र मनोज सदाशिव भिलंग (वय २२, रा. केजवड, ता. रिसोड, जि. वाशिम) यानेही उपचारादरम्यान शुक्रवारी (१३ फेब्रुवारी) शेवटचा श्वास घेतला.
रविवारी (८ फेब्रुवारी) सकाळी अनिकेत, मनोजसह अविनाश नितावणे, विशाल भंडारे व अन्य चार जण केटरिंगच्या कामासाठी हर्सूलजवळील लॉनवर गेले होते. काम आटोपून रात्री पायीच घरी निघाले. हर्सूलच्या जुना जकात नाक्याजवळ येताच मंगेश गोविंदराव कोलते (वय ३५, रा. मयूर पार्क) हे चालवत असलेली कार अचानक अनियंत्रित होऊन दुभाजकाला धडकली आणि तिनदा उलटून २० ते ३० फूट उडून या तरुणांवर आली. बाकीचे मित्र चपळाईने बाजूला झाले, मात्र अनिकेत, मनोज यांच्या अंगावर कार कोसळली.
यात अनिकेतचा जागीच मृत्यू झाला, तर मनोजवर खासगी रुग्णालयात उपचार सुरू होते. तो व्हेंटिलेटरवर होता. शुक्रवारी त्याचाही मृत्यू झाला. कारचालक मंगेश यांच्यावरही खासगी रुग्णालयात उपचार सुरू आहेत. अनिकेत विद्यापीठात एमएसडब्ल्यूचे शिक्षण घेत होता. त्याचे सख्खे मामा संदीप हिवराळे पहाडसिंगपुऱ्यात राहतात. त्यांच्या घराशेजारीच अनिकेत व मनोज मित्रांसोबत राहत होते. शिक्षणाचा खर्च तसेच कुटुंबाला आर्थिक हातभार लावण्यासाठी सुटीच्या दिवशी हे मित्र केटरिंगचे काम करायचे. मनोज पदव्युत्तर शिक्षण घेत होता. या प्रकरणात कारचालक मंगेश यांच्याविरुद्ध गुन्हा दाखल करण्यात आलेला आहे.
हिट ॲन्ड रन : हर्सूल सुसाट वाहनाने १७ वर्षीय मुलाचा घेतला बळीहर्सूल गावाजवळ गुरुवारी (१२ फेब्रुवारी) मध्यरात्री सुसाट वाहनाने अल्पवयीन मुलाला धडक देऊन पळ काढला. यात मुलाचा जागीच मृत्यू झाला आहे. उबेद जहीर पठाण (वय १७, रा. करीमनगर, हर्सूल) असे त्याचे नाव आहे. उबेद शिक्षण घेतानाच हर्सूलला भाजीपाला विकून आई-वडिलांना आर्थिक हातभार लावायचा. त्याच्या वडिलांचा अनेक वर्षांपासून भाजीपाल्याचा व्यवसाय आहे. हर्सूल गावातील हनुमान मंदिराजवळ ते भाजीपाला गाडी लावतात. गुरुवारी रात्री काम संपवून उबेद घराकडे पायी निघाला. मात्र, फुलंब्रीच्या दिशेने जाणाऱ्या सुसाट वाहनाने त्याला धडक दिली. उबेद वाहनात अडकून दूरपर्यंत फरपटत गेला. कंबरेखालचा भाग वाहनाखाली आल्याने जागीच मृत्युमुखी पडला. उबेदच्या पश्चात आई-वडील, भाऊ, बहिणी असा परिवार आहे.
