Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : कामगारानेच मालकाचा विश्वासघात करत मध्यरात्री येऊन ऑफीसमधील टीव्ही, रोकड लंपास केली. सीसीटीव्ही फूटेजमध्ये चोरीची घटना टिपली गेली. त्याआधारे पोलिसांनी चोराच्या मुसक्या आवळून त्याच्याकडून मुद्देमाल जप्त केला. ही कारवाई शुक्रवारी (१३ फेब्रुवारी) करण्यात आली.
या प्रकरणात नील जराड डिसूजा (वय ३०, रा. आकाशवाणी परिसर) यांनी तक्रार दिली होती. तक्रारीनुसार, २८ जानेवारीला पहाटे दोनच्या सुमारास मोंढा नाका येथील मेट्रो वाईन शॉपच्या वर असलेल्या ऑफिसमधील २९ हजार ९९० रुपयांचा एलसीडी टीव्ही व साडेचार हजार रुपये रोख तीन चोरट्यांनी चोरून नेली आहे. त्यावरून जवाहरनगर पोलिसांनी गुन्हा दाखल करून तपास सुरू केला. घटनास्थळावरील सीसीटीव्ही फूटेज पाहून चोरांचा शोध सुरू केला असता पोलीस अंमलदार मारोती गोरे यांना गुप्त बातमीदारामार्फत माहिती मिळाली की, हा सीसीटीव्ही फूटेजमध्ये दिसणारा व्यक्ती मूळचा गायकवाड वस्ती श्रीरामपूर जि. अहिल्यानगर येथील आहे. सध्या तो मुकुंदवाडीत आहे.
वरिष्ठ पोलीस निरीक्षक सचिन कुंभार यांच्या आदेशावरून बिट मार्शलचे सहायक फौजदार रमेश जाधव व पोलीस अंमलदार मारोती गोरे यांनी मुकुंदवाडीकडे धाव घेतली. तिथे सीसीटीव्ही फूटेजमध्ये दिसणारा व्यक्ती पोलीस पकडण्यासाठी येत असल्याचे पळायला लागला. पोलिसांनी त्याचा पाठलाग करून थोड्याच अंतरावर पकडले. त्याचे नाव, गाव विचारले असता त्याने अजय गौतम मोटे (वय २२, रा. गायकवाड वस्ती श्रीरामपूर) असे सांगितले. त्याने चोरी केल्याची कबुली दिली. गुन्ह्यातील मुद्देमालाबाबत विचारले असता उडवाउडवीची उत्तरे दिली. पोलिसांनी त्याला १३ फेब्रुवारीला अटक करून न्यायालयात हजर केले. न्यायालयाने दोन दिवसांची पोलीस कोठडी सुनावली.
पोलीस कोठडीतील चौकशी दरम्यान चोरी केलेला मुद्देमाल त्याने मुकुंदवाडी येथील रूमवर ठेवल्याचे सांगितले. त्याने काष्ठी (ता. श्रीगोंदा) येथून मोटारसायकल चोरी केल्याची कबुली दिली. गुन्ह्यात वापरलेली विना नंबरची मोपेड स्कुटी ही १० हजांत विकत घेतल्याचे सांगितले. या गुन्ह्यातील मुद्देमाल, मोपेड स्कुटी, मोटारसायकल असा एकूण १ लाख ६४ हजार ४९० रुपयांचा मुद्देमाल पोलिसांनी जप्त केला. ही कारवाई पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त मनोज पगारे, वरिष्ठ पोलीस निरीक्षक सचिन कुंभार यांच्या मार्गदर्शनाखाली बिट मार्शलचे सहायक फौजदार रमेश जाधव, पोलीस अंमलदार मारोती गोरे, गुन्ह्याचे तपासिक अंमलदार श्री. उईके यांनी केली.
