खुलताबाद (मेट्रोपोलिस पोस्ट वृत्तसेवा) : वेरूळ येथील बारावे ज्योतिर्लिंग श्री घृष्णेश्वर मंदिर संस्थान आणि प्रशासनाने अखेर आपला निर्णय मागे घेतला आहे. ‘मेट्रोपोलिस पोस्ट’ने या संदर्भात रोखठोक वृत्त प्रसिद्ध करत गर्दीचे नियोजन करण्याऐवजी गाभारा बंद करून बाहेरून दरवाजातूनच भाविकांना दर्शन देण्याच्या निर्णयावर टीका केली होती. शुक्रवारी (१३ फेब्रुवारी) गाभारा बंदीचा निर्णय मागे घेण्यात आल्याचे प्रशासनाकडून स्पष्ट करण्यात आले. त्यामुळे महाशिवरात्रीलाही आता भाविकांना गाभाऱ्यात जाऊन श्री घृष्णेश्वराचे दर्शन घेता येणार आहे. या निर्णयाबद्दल भाविकांनी समाधान व्यक्त केले आहे.
महाशिवरात्रीनिमित्त वेरूळ येथे मोठी यात्रा भरते. देशभरातून लाखो भाविक दर्शनासाठी येतात. मंदिर गाभारा दर्शन सुरू ठेवल्यास दर्शनासाठी ४ ते ५ तास लागतात व भाविकांच्या दर्शनासाठी लांबच लांब रांगा लागतात. यामुळे भाविकांची मोठी गैरसोय होते, असे कारण गाभारा दर्शन बंद करण्यामागे देण्यात आले होते. योग्य नियोजन, बंदोबस्त करण्याऐवजी भाविकांना पुढे करून प्रशासन आपले अपयश भाविकांच्या खांद्यावर टाकत असल्याची चर्चा सुरू झाली होती. या निर्णयामुळे भाविकांच्या भावनाही दुखावल्या गेल्या होत्या. या निर्णयावर ‘मेट्रोपोलिस पोस्ट’ वृत्तपत्राने परखड शब्दांत टीका केली होती.
आ. प्रशांत बंब यांनीही जिल्हा नियोजन समितीच्या बैठकीत जिल्हाधिकाऱ्यांना महाशिवरात्रीच्या दिवशी घृष्णेश्वराचे दर्शन गाभाऱ्यातूनच दिले जावे, याबाबत सूचित केले. शुक्रवारी (दि.१३) वेरूळ येथे महास्वच्छता अभियान राबविण्यात आले. या वेळी जिल्हाधिकारी स्वामी श्री घृष्णेश्वराच्या दर्शनास आले असता विश्वस्त समितीचे अध्यक्ष कुणाल दांडगे, उपाध्यक्ष योगेश टोपरे, संजय वैद्य, राजेंद्र कौशिके, मिलींद शेवाळे यांनी जिल्हाधिकाऱ्यांची भेट घेतली व महाशिवरात्रीच्या दिवशी पारंपरिक दर्शन व्यवस्था तशीच सुरू ठेवावी, अशी मागणी केली. त्यावर भाविकांच्या श्रद्धेचा सन्मान राखत जिल्हाधिकारी स्वामी यांनी दर्शन गाभाऱ्यातून देण्याला परवानगी दिली. या वेळी चोख व्यवस्था ठेवण्याच्या सूचना दिल्या.
वाहतुकीत बदल...दर्शनासाठी येणाऱ्या भाविकांच्या वाहनांच्या पार्किंगची व्यवस्था वेरूळ गावापासून काही अंतरावर केली आहे. गावातील भगवान महावीर ते मालोजीराजे भोसले चौक या दरम्यानचा दोन्ही बाजूंचा रस्ता सर्व वाहनांना अत्यावश्यक सेवा वगळता बंद करण्यात येणार आहे. १४ ते १९ फेब्रुवारी दरम्यान धुळे- सोलापूर महामार्गावरील वाहतूक मार्गात बदल करण्याचे पत्रक पोलीस अधीक्षक डॉ. विनयकुमार राठोड यांनी काढले आहे. त्यानुसार कन्नड, वेरूळ, खुलताबाद, दौलताबादमार्गे छत्रपती संभाजीनगर जाणारी वाहने कन्नड, वेरूळ, कसाबखेड फाटा, वरझडी, माळीवाडा, शरणापूर फाटामार्गे छत्रपती संभाजीनगरकडे जातील. छत्रपती संभाजीनगर, दौलताबाद, खुलताबाद, वेरूळमार्गे कन्नडकडे जाणारी वाहने छत्रपती संभाजीनगर, शरणापूर फाटा, माळीवाडा, वरझडी, कसाबखेडा फाटा, वेरूळमार्गे कन्नडकडे जातील. फुलंब्री, सुलतानपूर, खुलताबाद, वेरूळमार्गे कन्नडकडे जाणारी वाहने फुलंब्री, छत्रपती संभाजीनगर, शरणापूर फाटा, माळीवाडा, वरझडी, कसाबखेडा फाटा, वेरूळमार्गे कन्नडकडे जातील.
