Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : महसूलमंत्री चंद्रशेखर बावनकुळे यांनाही शुक्रवारी (२६ डिसेंबर) महायुतीत जागा वाटपावर तोडगा काढता आला नाही. मात्र ९९ टक्के निर्णय झाला असून, काही जागांवर तडजोड सुरू आहे, असे बावनकुळे यांनी सांगितले. ठाकरे गटातून भाजप आणि शिंदे गटात आलेले पदाधिकारी हे उमेदवारीच्या आशेनेच आलेले आहेत. त्यांना उमेदवारी देणे, त्याशिवाय पक्षातील इच्छुकांनी आधीपासून केलेली तयारी, यामुळे भाजप आणि शिंदे गट दोन्ही पक्षांची दमछाक होत आहे.
चिकलठाणा येथील भाजप विभागीय कार्यालयात बावनकुळे यांनी दिवसभर बैठका घेतल्या. मंत्री अतुल सावे, खा. भागवत कराड, शहराध्यक्ष किशोर शितोळे यांची बैठक झाल्यानंतर रात्री उशिरा मंत्री संजय शिरसाट यांच्या निवासस्थानी गेले. तिथे दोन्ही पक्षांतील नेत्यांची चर्चा झाली. शिंदे गटाकडून जास्तीच्या जागा मागितल्या जात असल्याने भाजपची कोंडी होत आहे. दरम्यान, अजित पवार गटाने अधिक वाट न पाहता आपला वेगळा मार्ग निवडला असून, आमच्या पक्षाचे १०० उमेदवार निवडणूक स्वबळावर लढणार असल्याची माहिती शहराध्यक्ष अभिजीत देशमुख यांनी दिली. भाजप- शिंदे गटात अद्याप चर्चेचे गुऱ्हाळ सुरू आहे. यामुळे अजित पवार गटाने घराणेशाहीविरोधात रणशिंग फुंकून निवडणूक रिंगणात उमेदवार उतरविण्याचा निर्णय घेतला आहे. महायुतीत आम्ही लढणार नाही, असे स्पष्ट करण्यात आले.
.jpg)
