डॉ. भागवत कराडांचे पूत्रप्रेम जागले!; अवघे २५ लाख भागभांडवल असलेल्या कंपनीला ४७०० कोटींचे कंत्राट मिळाले कसे?, जयश्री खाडिलकर यांच्या गंभीर आरोपाने खळबळ

छत्रपती संभाजीनगर (मेट्रोपोलिस पोस्ट वृत्तसेवा) : सामाजिक कार्यकर्त्या जयश्री खाडिलकर यांनी भाजप नेते डॉ. भागवत कराड यांच्यावर केलेल्या गंभीर आरोपाने राज्यात खळबळ उडाली आहे. डॉ. कराड यांनी आपल्या मुलाच्या अवघ्या १ वर्ष जुन्या आणि अवघे २५ लाख रुपये भागभांडवल असलेल्या ‘एलएनके ग्रीन एनर्जी प्रा. लि.' कंपनीला तब्बल ४७०० कोटींचे कंत्राट मिळवून दिल्याचा गौप्यस्फोट जयश्री यांनी केला आहे. हे कंत्राट पैठणच्या जायकवाडी धरणावरील तरंगत्या सौर ऊर्जा प्रकल्पाशी संबंधित असल्याचेही त्यांनी सांगितले.

डॉ. कराड यांचे सुपूत्र वरुण ‘एलएनके ग्रीन एनर्जी प्रा. लि.' कंपनीत भागीदार आहेत. या कंपनीने महाराष्ट्र सरकारशी करार केला आहे. दावोस येथे पार पडलेल्या आर्थिक परिषदेत करण्यात आलेल्या या करारामुळे २५०० जणांना रोजगार मिळेल, असा दावा करण्यात आला आहे. या कंपनीला शेंद्रा एमआयडीसीत ६३ एकर जागा देण्याच्या हालचालीही सुरू आहेत. जयश्री खाडिलकर यांनी सोशल मीडियावर टाकलेल्या व्हिडीओद्वारे सांगितले, की  एलएनके ग्रीन एनर्जी कंपनी जायकवाडी धरणावर तरंगते सौर पॅनल बसवणार आहे. वरुण कराड यांनी ही कंपनी जून २०२५ मध्ये स्थापन केली.

या कंपनीला सौर ऊर्जा निर्मितीचा कोणता पूर्वानुभवही नाही. अशा नवख्या कंपनीला तब्बल ४७०० कोटींचे कंत्राट देण्यात आले आहेत. या कंपनीत आणखी २ पार्टनर असून, त्यापैकी परितोष लधानी एक आहे. लधानी यांची एसएलएमजी नावाची कंपनी देशभरातील कोकाकोला कंपनीचे बॉटलिंगचे काम करते. म्हणजे या कंपनीचाही सौर ऊर्जेशी सूतराम संबंध नाही. वरुण हे केवळ भागवत कराड यांचे सुपूत्र आहेत म्हणून त्यांच्या कंपनीला इतके मोठे कंत्राट देण्यात आल्याचा आरोप जयश्री खाडिलकर यांनी केला आहे. भागवत कराड केंद्रात असताना वीज निर्मितीशी संबंधित विविध समित्यांवर होते. त्यांनी दबाव टाकून किंवा आपल्या संबंधांद्वारे मुलाला हे कंत्राट मिळवून दिले, असा आरोप त्यांनी केला.