छत्रपती संभाजीनगर (मेट्रोपोलिस पोस्ट वृत्तसेवा) : बाटलीत पेट्रोल देण्यास नकार दिल्याने संतप्त टवाळखोरांनी आम्ही पंढरपूरचे दादा, भाई लोक आहोत, असे म्हणत वाळूज एमआयडीसीच्या ओएसिस चौकातील राजपूत पेट्रोलपंपावर राडा केला. शनिवारी (२१ फेब्रुवारी) सायंकाळी पावणेपाचच्या सुमारास हा प्रकार घडला. वाळूज एमआयडीसी पोलिसांनी या राड्याप्रकरणी तिघांना ताब्यात घेतले आहे.
फकीर दशरथ मुंगसे (वय ४०, रा. गोलवाडी) यांनी या प्रकरणात तक्रार दिली. तक्रारीत म्हटले आहे, की ते राजपूत पेट्रोलपंपावर कर्मचारी आहेत. शनिवारी सायंकाळी पावणेपाचच्या सुमारास पेट्रोलपंपावर चार जण आले. त्यांनी बाटलीत पेट्रोल मागितले. त्यावर मुंगसे यांनी त्यांना बाटलीत पेट्रोल देण्यास मनाई असल्याचे सांगितले. त्यामुळे चौघेही संतप्त झाले. एकाने स्वतःचे नाव राजू शेख सांगत आम्ही पंढरपूरचे दादा भाई लोक आहोत, आम्हाला ओळखत नाहीस का, असे म्हणत शिवीगाळ सुरू केली.
दुसऱ्याने स्वतःचे नाव हसीम बेग म्हणत तू पंढरपूरच्या कोणालाही विचार, तू तुम्हाला कसा काय ओळखत नाही, असे म्हणत बाजूला पडलेला दगड उचलून मुंगसे यांच्या डोक्यात मारला. सर्वांनी मिळून शिवीगाळ करत जीवे मारण्याची धमकी दिली. जखमी मुंगसे यांनी पोलीस ठाण्यात धाव घेत तक्रार दिली. त्यावरून पोलिसांनी गुन्हा दाखल करून हसीम बेग, अरबाज शेख आणि दिवेश बनकर या तिघांना ताब्यात घेतले आहे. त्यांची चौकशी सुरू आहे. चौथ्याचा शोध सुरू आहे.
.jpg)
.jpg)
