गप्प करण्यासाठी गुन्हे दाखल करण्याचे कारस्थान, २० मिनिटे इम्तियाज जलील यांनी केला कोर्टात युक्तीवाद!; न्यायालयासमोर काय म्हणाले जलील...

छत्रपती संभाजीनगर (मेट्रोपोलिस पोस्ट वृत्तसेवा) : ‘ॲट्रॉसिटी’च्या गुन्ह्यांतून मुक्त करावे, असा अर्ज एमआयएमचे प्रदेशाध्यक्ष तथा माजी खासदार इम्तियाज जलील यांनी न्यायालयाकडे केला होता. त्यावर मंगळवारी (१० फेब्रुवारी) विशेष न्यायाधीश तथा अप्पर सत्र न्यायाधीश रा. दा. पाटील यांच्यासमोर सुनावणी झाली. मात्र या प्रकरणात ‘आमचे म्हणणे ऐकून घेतल्याशिवाय आदेश करू नये', असा अर्ज सरकारी वकील ॲड. सतीश मुंदवाडकर यांनी केल्याने न्यायालयाने पुढील सुनावणी २१ फेब्रुवारीला ठेवली आहे.

जलील यांनी पत्रकार परिषद घेऊन मंत्री संजय शिरसाट आणि त्यांच्या मुलांवर जमीन गैरव्यवहाराचे आरोप केले होते. हे आरोप करताना त्यांनी सरकारी कागदपत्राचे वाचन करताना आक्षेपार्ह शब्‍दाचा उच्चार केला होता. तो शब्द पकडून जलील यांच्याविरुद्ध बेगमपुरा व क्रांती चौक पोलीस ठाण्यात ॲट्रॉसिटीचे दोन गुन्हे ऑगस्ट महिन्यात दाखल करण्यात आले. या गुन्ह्यांतून आपल्याला मुक्त करावे, यासाठी जलील यांनी स्वतःच २० मिनिटे युक्तीवाद करून आपली बाजू प्रभावीपणे मांडली.

मांझादेवी विरुद्ध ओंकारदीप अहलुवालिया तसेच कर्नाटकातील प्रकरणांचा दाखला त्यांनी युक्तीवादात दिला. केंद्र सरकारने राज्याच्या समाजकल्याण मंत्रालयाला पाठवलेल्या पत्रात नमूद बंदी असलेल्या शब्दाचा उल्लेख असल्याचेही न्यायालयाच्या निदर्शनास आणून दिले. पत्रकार परिषदेत आपण केवळ सरकारी कागदपत्रांचे वाचन केले. आपला कोणाला दुखावण्याचा हेतू नव्हता. मात्र मला गप्प करण्यासाठी गुन्हे दाखल करण्याचे कारस्थान रचले गेले, असे जलील यांनी सांगितले. दाखल तक्रारींमध्ये आपण मुस्लिम धर्माचे असल्याचेही नमूद केल्याकडे जलील यांनी लक्ष वेधले.