‘आरटीओ’चा एजंट २० हजारांची लाच घेताना ACB च्या जाळ्यात!; कर्णपुऱ्यात रंगेहात पकडला..., ते ४ अधिकारी कोण?

By City News Desk

On 11 Feb 2026

‘आरटीओ’चा एजंट २० हजारांची लाच घेताना ACB च्या जाळ्यात!; कर्णपुऱ्यात रंगेहात पकडला..., ते ४ अधिकारी कोण?

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : सहा ट्रेलर वाहनांवर ओव्हरलोडिंगची कारवाई न करण्यासाठी आणि त्यांची वाहतूक सुरळीत सुरू ठेवण्यासाठी आरटीओ अधिकाऱ्यांच्या नावाने एजंट साहिल ऊर्फ भीमराव लक्ष्मण पवार (वय २१, रा. शिवाजीनगर, पुणे) याने लाच मागितली. सोमवारी (९ फेब्रुवारी) छत्रपती संभाजीनगर शहरातील कर्णपुरा परिसरातील शनि मंदिराजवळ लाचलुचपत प्रतिबंधक विभागाने (एसीबी) सापळा रचून या एजंटला २० हजार रुपये घेताना रंगेहात पकडले.

या कारवाईमुळे छत्रपती संभाजीनगर प्रादेशिक परिवहन कार्यालयातील (आरटीओ) लाचखोर अधिकाऱ्यांचे धाबे दणाणले असून, साहिल कुणासाठी लाच घेत होता, हे चौकशीसमोर समोर येईल, अशी अपेक्षा व्यक्त केली जात आहे. साहिलला अटक करून एसीबीने वेदांतनगर पोलीस ठाण्यात त्यांच्याविरुद्ध गुन्हा दाखल केला आहे. साहिलने नवनाथ ट्रान्सपोर्टच्या प्रत्येक ट्रेलरचे ३५०० रुपये याप्रमाणे सहा गाड्यांचे एकूण २१ हजार रुपये मागितले होते.

तक्रारदाराने अहिल्यानगर येथील एसीबी कार्यालयात तक्रार नोंदवली होती. एसीबीने आधी ६ फेब्रुवारीला लाचेच्या मागणीची पडताळणी केली. त्यानंतर सोमवारी सापळा रचला. तक्रारदाराने साहिलला कॉल केल्यानंतर माझ्याकडे २० हजार रुपये आहेत, ते घेऊन येऊ का?, असे विचारल्यावर साहिलने संमती दर्शवली. त्यानंतर साहिलने लाचेची रक्कम स्वीकारताच त्याला रंगेहात पकडण्यात आले. साहिलने चार आरटीओ अधिकाऱ्यांसाठी लाच घेतली आहे. ते अधिकारी कोण आहेत, याचा तपास एसीबीचे पथक करत आहेत.