प्रेयसीसाठी काय पण... २५ वर्षीय रिक्षाचालकाने वृद्धेचा गळा दाबून लुटले साडेसात तोळे सोने!, शिवाजीनगरातील धक्कादायक घटना

छत्रपती संभाजीनगर (मेट्रोपोलिस पोस्ट वृत्तसेवा) : वृद्धेच्या घरात घुसून गळा दाबून हत्येचा प्रयत्न करत रिक्षाचालकाने साडेसात तोळे सोने लुटले. ही घटना सोमवारी (९ फेब्रुवारी) सायंकाळी शिवाजीनगरमध्ये घडली. आकाश माधव अंभोरे (वय २५, रा. शिवाजीनगर, मूळ रा. बुलडाणा) असे लुटारूचे नाव असून, त्याला पुंडलिकनगर पोलिसांनी अवघ्या ३ तासांत कमळापूर येथून अटक केली. आकाशला हॉटेल सुरू करून प्रेमविवाह करायचा होता. प्रेयसीसाठी हे कृत्य केल्याची कबुली त्याने पोलिसांकडे दिली.

सुनंदा अशोक देवरे (वय ६४, रा. शिवाजीनगर) यांनी या प्रकरणात तक्रार दिली आहे. त्या पतीच्या निधनानंतर एकट्याच राहतात. रिक्षाचालक असलेला आकाश २०१८ पासून त्यांच्या ओळखीचा आहे. त्या नेहमी त्याच्या रिक्षातून रुग्णालयात जात असत. सुरक्षित ने-आण होत असल्याने सुनंदाबाईंचा त्याच्यावर विश्वास होता. तीन-चार दिवसांपासून तो त्यांच्या घरी गप्पा मारण्यासाठी येत होता. सोमवारी सायंकाळीही तो त्यांच्या घरी आला. त्याने सुनंदाबाईंना पाणी मागितले. त्या पाणी आणण्याठी किचनमध्ये जात असतानाच आकाशने मागून जात रुमालाची गुंडाळी करून त्यांचा गळा आवळला. त्यामुळे त्या खाली पडल्या. त्यानंतर आकाशने त्यांच्या गळ्यातील ५ तोळ्यांची ५३ मण्यांची रुद्राक्ष माळ व अडीच तोळे वजनाची ८४ मण्यांची तुळशीमाळ असे एकूण साडेसात तोळे सोने हिसकावले व पळून गेला.

सुनंदाबाईंनी पुंडलिकनगर पोलिसांत धाव घेऊन तक्रार दिल्यानंतर पोलिसांनी लगेचच आकाशचा शोध सुरू केला. त्याचे लोकेशन कमळापूर भागात येत होते. पोलिसांनी लगेचच तिकडे धाव घेतली. मंगळवारी (१० फेब्रुवारी) पहाटे एकच्या सुमारास पोलीस निरीक्षक अशोक भंडारे, पोलीस उपनिरीक्षक विनोद भालेराव यांच्या पथकाला कमळापूर फाट्याजवळ आकाश स्पोर्ट्‌स बाइकवर दिसला. पोलिसांना पाहून तो दुचाकीवरून सुसाट निघाला. पोलिसांनी पाठलाग सुरू केला. त्यात दुचाकीवरून पडल्याने दुचाकी तिथेच सोडून तो गल्लीबोळात पळू लागला. पोलिसांनीही पिच्छा पुरवत एका कारखाली लपलेल्या आकाशच्या मुसक्या आवळल्या. कारवाईत सहायक पोलीस निरीक्षक शिवाजी चौरे, पोलीस अंमलदार प्रकाश डोंगरे, शिवाजी शिंदे, अजय कांबळे, अंकुश वाघ, राजू गवळी, संदीप क्षीरसागर यांनी सहभाग घेतला.

शहरात चोरट्यांचा हैदोस...
शहरात लुटमारीच्या घटना वाढल्या आहेत. शिवशंकर कॉलनीतील रहिवासी मानसिंग संत्रे (वय ७२) ९ फेब्रुवारीला हनुमाननगरातील मारुती मंदिरातून घरी जात असताना दुचाकीवरून आलेल्या २ तोतया पोलिसांनी बनावट ओळखपत्र दाखवून त्यांची ८ ग्रॅम सोन्याची अंगठी दिशाभूल करून गायब केली. या प्रकरणात जवाहरनगर पोलिसांनी गुन्हा दाखल केला आहे.
१ गारखेडा परिसरातील गजानन महाराज मंदिरात पती, मुलासह दर्शनासाठी आलेल्या सुरेखा भोपळे यांच्या गळ्यातील ५ ग्रॅमचे मंगळसूत्र चोरट्यांनी ८ फेब्रुवारीला लंपास केले. मंदिरातच दर्शनासाठी आलेल्या मीरा बोराडे यांचेही ३.५ ग्रॅमचे मंगळसूत्र चोरट्यांनी चोरले.
२ विवेकानंद महाविद्यालयाच्या भागात सत्संगासाठी आलेल्या मीरा बकाल यांच्या गळ्यातील १४ ग्रॅमचे सोन्याचे मंगळसूत्र चोरट्यांनी ९ फेब्रुवारीला दुपारी लंपास केले. त्यांच्यासह सुशीला माकोल व अन्य भाविकांचेही मोबाईल, दागिने, रोख, मोबाईलही चोरीला गेले. क्रांतीचौक पोलिसांनी या सर्व चोरीच्या घटनांची नोंद केली.
३ हर्सूल येथील मनीषा गणेश साळवे ६ फेब्रुवारीला सायंकाळी हर्सूल टी पॉईंट येथून एसटी बसमध्ये बसल्या होत्या. त्यांच्या पर्समधील सोन्याचा १० ग्रॅमचा नेकलेस, १५ ग्रॅमची पोत व ४ ग्रॅमचे कानातले दागिने चोरट्याने लंपास केले. सावंगी गावाच्या पुढे बस गेल्यावर ही बाब लक्षात आली.