गंगापूरच्या भेंडाळ्याचा अंकुश यवतमाळमध्ये चालवायचा सेक्स रॅकेट!, अश्विनीसाठी करायचा घाणेरडे काम...

छत्रपती संभाजीनगर/यवतमाळ (मेट्रोपोलिस पोस्ट वृत्तसेवा) : छत्रपती संभाजीनगर जिल्ह्यातील गंगापूर तालुक्यातील भेंडाळा येथील अंकुश रामभाऊ कडू (वय ४०) याने चक्क यवतमाळमध्ये सेक्स रॅकेट चालवायला सुरुवात केली होती. यवतमाळ शहर पोलिसांनी शुक्रवारी (६ फेब्रुवारी) दुपारी ३ च्या सुमारास अलिशान फ्‍लॅटवर छापा मारून कुंटणखाना उघडकीस आणला. या ठिकाणी अंकुश आणि त्याची साथीदार अश्विनी देविदास मलांडे (वय ३१, रा. पोस्ट मोहा, जामडोह, ह. मु. समर्पण अपार्टमेंट पिंपळगाव रोड यवतमाळ) यांनी मिळून एका ३३ वर्षीय युवतीला डांबून ठेवले होते. तिच्याकडून ते वेश्या व्यवसाय करवून घेत होते. ही कारवाई यवतमाळ शहरातील पिंपळगाव रोडवरील समर्पण अपार्टमेंटच्या फ्‍लॅट क्र. २ मध्ये करण्यात आली.

अंकुश व अश्विनीला अटक करण्यात आली असून, त्यांच्याविरुद्ध पोलीस उपनिरीक्षक गणेश सपकाळ यांच्या तक्रारीवरून गुन्हा दाखल करण्यात आला आहे. पोलिसांना गोपनीय माहिती मिळाली, की अश्विनी देविदास मलांडे ही तिच्या किरायाने राहत असलेल्या फ्‍लॅटमध्ये महिलांना आणून ८ महिन्यांपासून वेश्या व्यवसाय चालविते. पोलिसांनी लगेचच छाप्याचे नियोजन केले. अश्विनीने किरायाने घेतलेल्या फ्‍लॅटच्या काही अंतरावर पोलीस पथक थांबले आणि बनावट ग्राहकाला फ्‍लॅटकडे पाठविले. काही वेळाने त्याने मोबाइलवरून पोलिसांना मिस कॉल दिला. पोलिसांनी लगेचच फ्‍लॅटकडे धाव घेतली. अश्विनी व तिच्यासोबत तिचा एजंट अंकुश कडू हॉलमध्ये बसलेला होता.

पोलीस निरीक्षक रामकृष्ण जाधव यांच्या नेतृत्त्वातील पोलिसांनी घराची पाहणी सुरू केली. बेडरूममध्ये बनावट ग्राहकासोबत एक महिला दिसून आली. बनावट ग्राहकाने सांगितले, की तो घरात आला तेव्हा तिला एक महिला दाखवून समागमासाठी १००० रुपयांचा दर सांगितला. बनावट ग्राहकाने होकार दिल्यानंतर त्या महिलेसोबत तो बेडरूममध्ये गेला होता. पोलिसांनी अश्विनीची अंगझडती घेतली असता तिच्याकडे ५०० रुपये मिळून आले. बेडरूममध्ये असलेली ३३ वर्षीय महिला यवतमाळचीच असल्याचे तिने सांगितले. तिच्या अंगझडतीत ५०० रुपये मिळून आले. १२ कंडोमही मिळून आले. अंकुश कुंटणखान्यावर ग्राहक शोधून आणत होता. अश्विनी व तो ३३ वर्षीय पीडित महिलेकडून वेश्या व्यवसाय करवून घेत होते, असे चौकशीतून समोर आले. अधिक तपास पोलीस निरीक्षक रामकृष्ण जाधव करत आहेत.