जन्मले कमी अन्‌ दाखले वाटले जास्त; सिल्लोड व सोयगाव तालुक्यातील अजब प्रकार; प्रशासन अचंबित, आता सगळीकडेच होणार तपासणी! 

छत्रपती संभाजीनगर (मेट्रोपोलिस पोस्ट वृत्तसेवा) : प्रत्यक्षात झालेल्या जन्मांच्या तुलनेत अर्ध्याहून अधिक जन्म दाखल्यांच्या नोंदी करून ते वाटप करण्यात  आल्याचा अजब प्रकार सिल्लोड तालुक्यात घडल्याचे समोर आला आहे. या प्रकाराने जिल्हा प्रशासन हादरले असून, यानंतर आता सिल्लोडसह सर्वच तालुक्यांतील गावांत झालेल्या जन्मांच्या नोंदींची तपासणी करण्याच्या सूचना जिल्हा आरोग्य अधिकाऱ्यांनी गटविकास अधिकारी आणि ग्रामविकास अधिकाऱ्यांना केल्या आहेत.

सिल्लोडसह अन्य तालुक्यांत जन्म-मृत्यूचे दाखले उशिरा वाटप होत असल्याच्या तक्रारी प्रशासनाकडे येत होत्या. त्यातच मध्यंतरी माजी खासदार किरीट सोमय्या यांनी सिल्लोडला भेट दिल्यानंतर सिल्लोडसह अन्य तालुक्यांतील गावांतील जन्म-मृत्यू दाखले तपासणीच्या सूचना केल्या होत्या. जिल्हा आरोग्य अधिकारी तथा जिल्हा निबंधक डॉ. अभय धानोरकर यांनी सिल्लोड तालुक्यातील उंडणगाव आणि सोयगाव तालुक्यातील मोलई या दोन गावांच्या ग्रामपंचायतीतील सॉफ्टवेअरची तपासणी केली. त्यात दोन्ही गावांत लोकसंख्येपेक्षा अर्ध्याहून अधिक जन्म दाखल्याच्या नोंदी करण्यात आल्याचे आढळले. या प्रकारामुळे जिल्हा आरोग्य यंत्रणा हादरून गेली.

प्राथमिक चौकशी केल्यावर ग्रामविकास अधिकाऱ्यांनी ग्रामपंचायतीतील सॉफ्टवेअरचा पासवर्ड हॅक झाल्यामुळे हा प्रकार घडल्याची शंका व्यक्त केली. जिल्हा आरोग्य अधिकारी डॉ. धानोरकर यांनीही असा प्रकार घडल्याचे मान्य केले असून, ‘ॲड ओल्ड' टॅबद्वारे किती नोंद घेतल्या, याची तपासणी केल्यावर ही बाब पुढे आल्याचे ते म्हणाले. १५ जानेवारीपर्यंत या दोन्ही गावांतील लोकसंख्येच्या तुलनेत अर्ध्याहून अधिक नोंदी झाल्याची माहिती त्यांनी दिली. हा प्रकार उघडकीस आल्यानंतर आता जिल्ह्यातील सर्वच गावांतील जन्म-मृत्यूच्या दाखल्यांची तपासणी ग्रामविकास अधिकारी आणि ग्रामविस्तार अधिकाऱ्यांनी करावी, अशा सूचना देण्यात आल्याचेही त्यांनी सांगितले.