मोठ मोठे गार केले... राजेंद्र जंजाळ म्हणाले, तसे पोस्टर्स कार्यकर्त्यांचा राग, पालकमंत्र्यांना करायचे होते हर्षदांना उपमहापौर, म्हणून मला विरोध!

छत्रपती संभाजीनगर (मेट्रोपोलिस पोस्ट वृत्तसेवा) : राजेंद्र जंजाळ आणि मंत्री संजय शिरसाट यांच्यातील संघर्षाच्या ठिणग्या आता पुन्हा उडायला सुरुवात झाल्या आहेत. जंजाळ हे उपमहापौरपदी विराजमान होताच त्यांच्या समर्थक, कार्यकर्त्यांनी महापालिकेसह शहरभर मोठा जल्लोष केला. पालकमंत्री संजय शिरसाट यांना डिवचण्यासाठी ‘आता कसं वाटतंय.. गोड गोड वाटतंय...’ ‘मोठ-मोठे गार केले, गंमत नाही, तू कोणाच्याही नादी लाग रग्गीलच्या नादी नको, लय महागात पडल’ असे पोस्टर्सही झळकवले. यावर आता राजेंद्र जंजाळ यांनी समोर आलेली प्रतिक्रियाही पालकमंत्री शिरसाटांना पुन्हा आव्हान देणारी आहे. पालकमंत्र्यांना हर्षदा शिरसाट यांना उपमहापौर करायचे होते. त्यांनी माझ्या उपमहापौरपदाच्या उमेदवारीला विरोध करायला नको होता. जल्लोष माझा नव्हे तर तो कार्यकर्त्यांचा राग होता. त्यांच्या भावनांना मी कुठेतरी वाट मोकळी होऊ दिली, स्पष्टीकरण जंजाळ यांनी दिले.

जंजाळ यांनी बुधवारी (११ फेब्रुवारी) पत्रकारांशी बोलताना सांगितले, की पालकमंत्री संजय शिरसाट आमचे नेते आहेत. लोकसभा निवडणूक आली, मी उमेदवारी मागितली तर त्यांनी तू अजून लहान आहेस म्हणत बोळवण केली. विधानसभेलाही नको म्हणाले. आता उपमहापौरपदासाठी आम्ही सर्व निकषांत बसत असतानाही ते नाही म्हणत असतील तर कार्यकर्त्यांना राग येणारच. कालच्या जल्लोषात १५ पेक्षा अधिक पराभूत उमेदवार सहभागी झाले होते. त्यांच्या भावनांना मी कुठेतरी वाट मोकळी करून दिली. रात्री ८ वाजेपर्यंत हा जल्लोष सुरू होता, असे जंजाळ म्हणाले.
गटाची नोंदणी अद्याप नाही
मंत्री शिरसाट आणि जंजाळ यांच्यातील वादामुळे शिंदे गटाने विभागीय आयुक्तांकडे अद्याप १३ नगरसेवकांची गट नोंदणीही केली नाही. गट नेत्‍याच्या नियुक्तीवरून शिरसाट आणि जंजाळांमध्ये आता शह-काटशहाचे राजकारण सुरू झाले आहे. त्यामुळे आता गटनेतेपदी उपमुख्यमंत्री एकनाथ शिंदे कुणाची निवड करतात, याची उत्सुकता निर्माण झाली आहे. मंत्री शिरसाट म्हणाले, की १८ फेब्रुवारीपूर्वी ही प्रक्रिया पूर्ण करायची आहे. माझे उपमुख्यमंत्री एकनाथ शिंदे यांच्याशी बोलणे झाले असून, त्यांनी त्र्यंबक तुपे यांच्या नावाला पसंती दिली आहे. तर जंजाळ म्हणाले, की पक्षाने अद्याप गटनेतेपदाचा निर्णय घेतलेला नाही. एकनाथ शिंदे जो निर्णय घेतील तोच गटनेता होईल.

त्र्यंबक तुपे म्हणाले, की मी पाचव्यांदा निवडून आलो आहे. पालकमंत्र्यांनी मला गटनेतेपदाची संधी दिली आहे. ही जबाबदारी मी समर्थपणे पार पाडेल, असे तुपे म्हणाले.  महापौर, उपमहापौरांच्या निवडणुकीला मंत्री संजय शिरसाट यांनी हजेरी लावली. ते उपमहापौरांच्या कक्षात जंजाळ यांना खुर्चीवर बसविण्यासाठीही सोबत गेले. त्यानंतर शिरसाट यांनी महापालिका मुख्यालय सोडले. नंतर जंजाळ खाली आले. त्यांचे स्वागत क्रेनद्वारे आणलेल्या हारने करण्यात आले. मनपा मुख्यालयापासून जंजाळ यांची भव्य रॅलीही वाजत गाजत काढण्यात आली. मुख्यालय परिसर, क्रांती चौक, पुंडलिकनगर रोड गुलालमय केले. शिरसाटांना डिवचणाऱ्या काही पोस्टर्समुळे आणि आता जंजाळ यांच्या वक्‍तव्‍यामुळे हा संघर्ष यापुढे पेटणार असल्याचे दिसून येत आहे.