मिसारवाडीत महिलांना भेटला ठग, चौघींनी डोक्याला लावला हात!

By City News Desk

On 12 Feb 2026

मिसारवाडीत महिलांना भेटला ठग, चौघींनी डोक्याला लावला हात!

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर शहरातील मिसारवाडीत महिलांना असा ठग भेटला, की त्यातील चौघींना डोक्याला हात लावून बसण्याची वेळ आली आहे. शिवणकामाच्या प्रशिक्षणाचे आणि शिलाई मशिन मिळवून देण्याचे आमिष दाखवून अडीच तोळे सोने घेऊन महेश खरात नावाचा ठग पळून गेला आहे. ही घटना सोमवारी (९ फेब्रुवारी) सायंकाळी मिसारवाडीच्या गल्ली क्रमांक १ मध्ये घडली.

खासगी रुग्णालयात साफसफाईचे काम करणाऱ्या महिलेच्या तक्रारीवरून सिडको पोलिसांनी या ठगाविरुद्ध गुन्हा दाखल केला आहे. महिलेच्या तक्रारीनुसार, १ फेब्रुवारीला मिसारवाडीत महेशने घरोघरी जात शिलाई मशीनच्या क्लासबाबत माहिती दिली. क्लास पूर्ण केल्यानंतर विशेष योजनेतून शिलाई मशीन मिळवून देतो, असे आमिष दाखवले. त्याच्यावर विश्वास ठेवत पाच महिलांनी क्लासचे २०० रुपये भरले.

मिसारवाडीत त्याने २ फेब्रुवारीपासून दुपारी २ ते ४:३० पर्यंत क्लासही सुरू केला. ९ फेब्रुवारीला क्लास झाल्यानंतर त्याने छायाचित्र काढण्यापुरते खरे दागिने प्लास्टिक पिशवीत ठेवण्यास सांगितले. नंतर चारही पिशव्या घेऊन पसार झाला. यात प्रज्ञा यांचे ८ ग्रॅम, समीक्षा यांचे ४.५ ग्रॅम, यशोदा यांचे ४.५ ग्रॅम, भाग्यश्री यांचे ३ ग्रॅम व अन्य एका महिलेचे २ ग्रॅमचे दागिने महेशने लंपास केले. महेशने दिलेला नंबरही परराज्यातील दुसऱ्याच व्यक्तीच्या नावे असल्याचे समोर आले. अधिक तपास सहायक पोलीस निरीक्षक योगेश गायकवाड करत आहेत.