धक्कादायक : व्हॅलेंटाइन वीकमध्ये छत्रपती संभाजीनगर शहरातून रोज २ तरुणी सोडताहेत घर!

छत्रपती संभाजीनगर (मेट्रोपोलिस पोस्ट वृत्तसेवा) : सध्या व्हॅलेंटाइन वीक असून, या प्रेमाच्या आठवड्यात तरुणाईवर प्रेमाचा फिवर चढला आहे. यातून किंवा अन्य कारणाने शहरातून रोज २ तरुण मुली घर सोडत असल्याचा धक्कादायक प्रकार ‘मेट्रोपोलिस पोस्ट-छत्रपती संभाजीनगर सिटी न्‍यूज’च्या समोर आला आहे. या नोंदी पोलीस दफ्तरी झाल्या असून, शहरातील पोलीस ठाण्यांतून घेतलेल्या माहितीनुसार जे आकडे समोर आले, ते हादरवणारे आहेत.

क्रांती चौक पोलीस ठाण्याच्या हद्दीतील २१ वर्षीय तरुणी म्हाडा कॉलनी बाबा पंप परिसरातून बेपत्ता झाली आहे. सिडको एमआयडीसी पोलीस ठाण्याच्या हद्दीतील  चिकलठाणा बौद्धवाड्यातून २५ वर्षीय, चिकलठाण्यातून २४ वर्षीय आणि सिडको बसस्थानक परिसरातून २२ वर्षीय अशा ३ तरुणी बेपत्ता झाल्या आहेत. जिन्सी पोलीस ठाण्याच्या हद्दीतील संजयनगरातून १८ वर्षीय मुलगी घरातून निघून गेली आहे. धक्कादायक म्हणजे वाळूज एमआयडीसी पोलीस ठाण्याच्या हद्दीतील तब्बल ५ तरुणी बेपत्ता झाल्या आहेत. यात रांजणगाव शेणपुंजी येथून १९ वर्षे वयाच्या २ तरुणी, कमळापूर येथून १९ वर्षीय तरुणी, पंढरपूर येथून २५ वर्षीय तरुणी, वडगाव कोल्हाटीतून २५ वर्षीय तरुणी बेपत्ता झाली आहे.

जिल्ह्यातून १० तरुणी बेपत्ता...
छत्रपती संभाजीनगरच्या ग्रामीण भागातून १० तरुणी याकाळात बेपत्ता झाल्या आहेत. यात शनी देवगाव (पोलीस ठाणे विरगाव) येथून २३ वर्षीय तरुणी, लासूरस्टेशन (पोलीस ठाणे शिल्लेगाव) येथून १८ वर्षीय तरुणी, पिशोर येथून (पोलीस ठाणे पिशोर) २४ वर्षीय व २३ वर्षीय अशा २ तरुणी, झाल्टा (पोलीस ठाणे चिकलठाणा) येथून २७ वर्षीय तरुणी, गंगापूर येथून २७ वर्षीय तरुणी, उपळी (पोलीस ठाणे सिल्लोड ग्रामीण) येथून २४ वर्षीय तरुणी, सिसारखेडा (पोलीस ठाणे सिल्लोड ग्रामीण) येथून २३ वर्षीय तरुणी, पाचोड येथून २२ वर्षीय तरुणी, वैजापूर शहरातून १८ वर्षीय तरुणी बेपत्ता झाली आहे.