दोन शिक्षकांवर पहिली ते सातवीचा भार, विद्यार्थ्यांचे शैक्षणिक नुकसान होत असल्याने ग्रामस्थांनी शाळेला ठोकले टाळे!; गंगापूर तालुक्‍यातील वजनापूरमधील प्रकार

By City News Desk

On 07 Oct 2025

दोन शिक्षकांवर पहिली ते सातवीचा भार, विद्यार्थ्यांचे शैक्षणिक नुकसान होत असल्याने ग्रामस्थांनी शाळेला ठोकले टाळे!; गंगापूर तालुक्‍यातील वजनापूरमधील प्रकार

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

गंगापूर (मेट्रोपोलिस पोस्ट वृत्तपत्राच्या सौजन्याने) : वजनापूर (ता. गंगापूर) येथील जिल्हा परिषद प्राथमिक शाळा १ ली ते ७ वीपर्यंत आहे. शाळेत केवळ दोनच शिक्षक कार्यरत असल्याने अनेक वर्ग बंद राहत होते. विद्यार्थ्यांचे शैक्षणिक नुकसान होत असल्याने सरपंच शिवम जाधव यांच्यासह ग्रामस्थांनी एकत्र येत आज, ७ ऑक्टोबरला सकाळी ९.३० वाजता शाळेला टाळे ठोकून प्रशासनाचे या गंभीर समस्येकडे लक्ष वेधले.

अशीच अवस्था झोडेगाव जिल्हा परिषद शाळेचीही आहे. झोडेगावमधील शिक्षकांना अतिरिक्त जबाबदाऱ्याच इतक्या दिलेल्या असतात, की ते वर्गावर कमी अन्‌ अन्य कामांत गुंतलेले जास्त दिसतात. यामुळे विद्यार्थ्यांचे नुकसान होत आहे. वजनापूरमध्ये सरपंच जाधव आणि ग्रामस्थांनी घेतलेल्या पवित्र्यामुळे गटशिक्षणाधिकारी आणि विस्तार अधिकाऱ्यांनी संवाद साधत तातडीने शिक्षकांची नेमणूक केली जाईल, असे आश्वासन दिले.

त्यामुळे ग्रामस्थांनी आंदोलन मागे घेतले. झोडेगाव येथील जिल्हा परिषद शाळेत विद्यार्थ्यांची संख्या चांगली असून १ ली ते ८ वी पर्यंत शिक्षण दिले जाते. शाळेत सध्या सात शिक्षकांची नेमणूक असली तरी मुख्याध्यापकांकडे केंद्रप्रमुखपदाची अतिरिक्त जबाबदारी दिल्याने ते नियमित अध्यापन करत नाहीत. त्यामुळे सहा शिक्षकच शिकवताना दिसत असतात. त्यामुळे विद्यार्थ्यांचे शैक्षणिक नुकसान होत असल्याची ग्रामस्थांची तक्रार आहे.