१२ वर्षीय मुलीवर दोघांचा लैंगिक अत्याचार, वैजापूर तालुक्यातील खळबळजनक घटना

वैजापूर (मेट्रोपोलिस पोस्ट वृत्तसेवा) : १२ वर्षीय मुलीवर दोघांनी लैंगिक अत्याचार केल्याचा संतापजनक प्रकार विरगाव पोलीस ठाण्याच्या हद्दीत समोर आल्याने खळबळ उडाली आहे. पीडित मुलगी ऊसतोड मजुराची मुलगी आहे. विरगाव पोलिसांनी दोघा नराधमांविरुद्ध रविवारी (२९ डिसेंबर) गुन्हा दाखल केला आहे.

गणेश मच्छिंद्र बारसे (वय २२) आणि संजय लक्ष्मण निकम (वय ३१, दोघे रा. विरगाव) अशी नराधमांची नावे आहेत. पोलीस सूत्रांनी सांगितले, की पीडित मुलीचे आई-वडील ऊसतोड कामगार असून, ते विरगाव पोलीस ठाण्याच्या हद्दीत ऊसतोडीच्या कामाला आले आहेत. २६ डिसेंबरला संध्याकाळी सर्वांचे जेवण झाल्यावर बाथरूमसाठी घराबाहेर पडलेली १२ वर्षीय मुलगी घरी परतली नव्हती. रात्रभर तिचा कुटुंबाने शोध घेतला. दुसऱ्या दिवशीही ती मिळून न आल्याने अखेर विरगाव पोलिसांत तिच्या अपहरणाची तक्रार करण्यात आली होती.

ट्रकवर चालक असलेला गणेश बारसे व क्लिनर असलेल्या संजय निकमने तिला प्रेमाच्या जाळ्यात ओढले होते. तिच्यावर वेळोवेळी लैंगिक अत्याचार केला. त्यांनी मुलीला पळवून पनवेलला नेले होते. सहायक पोलीस निरीक्षक शंकर वाघमोडे यांच्या मार्गदर्शनाखाली पोलीस उपनिरीक्षक अशोक माने यांच्या पथकाने पनवेल येथे जाऊन नराधमांच्या मुसक्या आवळल्या आणि १२ तासांतच मुलीची सुटका केली. तिच्या जबाबावरून नराधमांनी तिच्यावर वारंवार लैंगिक अत्याचार समोर आले. त्यांच्याविरुद्ध पोक्सो कायद्यांतर्गत गुन्हा दाखल करण्यात आला आहे. वैजापूर न्यायालयात दोघांना हजर केले असता दोन दिवसांची पोलीस कोठडी सुनावण्यात आली.