शेतात जाण्यासाठी रस्ता नसल्याने मंत्री शिरसाट, आ. भुमरेंनी केली ट्रॅक्‍टरमधून पाहणी!

By City News Desk

On 18 Sep 2025

शेतात जाण्यासाठी रस्ता नसल्याने मंत्री शिरसाट, आ. भुमरेंनी केली ट्रॅक्‍टरमधून पाहणी!

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

पैठण (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर जिल्ह्यात अतिवृष्टी झाली असून, पैठण, कन्‍नड, सिल्लोड, सोयगाव तालुक्‍यातील शेतकऱ्यांचे १०० टक्‍के नुकसान झाले आहे. अशा स्थितीत शासनाने तातडीने शेतकऱ्यांना दिलासा देण्याची गरज आहे. मुख्यमंत्री देवेंद्र फडणवीस यांनी शासन शेतकऱ्यांच्या पाठिशी असल्याचे सांगितले. आज, १८ सप्टेंबरला पालकमंत्री संजय शिरसाट आणि पैठणचे आमदार संदिपान भुमरे यांनी अतिवृष्टीमुळे नुकसान झालेल्या शेतीची पैठण तालुक्‍यात पाहणी केली. मात्र पाहणी करताना शेतात जाण्यासाठी रस्ता नसल्याने ट्रॅक्‍टरमधून त्‍यांना पाहणी करावी लागली.

मंत्री शिरसाट म्‍हणाले, की पैठण तालुक्यातील उभी पिके पाण्याखाली गेली आहेत. मराठवाड्यात ओला दुष्काळ जाहीर करण्याची मागणी आम्‍ही मुख्यमंत्री देवेंद्र फडणवीस यांच्याकडे केली आहे. शेतकऱ्यांना तातडीने मदत जाहीर करण्याची गरज आहे. पाच-सहा दिवसांत याबाबत मोठी घोषणा होण्याची शक्यता आहे, अशी माहिती त्यांनी दिली. पैठण तालुक्‍यातील कातपूर शिवारात मंत्री शिरसाट आणि आ. भुमरे पाहणी करत होते. पाहणी करत असताना ते अशा ठिकाणी आले, जिथे समोरच रस्ताच नव्हता. त्‍यामुळे शिरसाट आणि भुमरेंनी सोबतच्या अधिकाऱ्यांसोबत ट्रॅक्टरमधून पाहणीचा निर्णय घेतला. ट्रॅक्टरच्या ट्रॉलीत बसून पिकांचे प्रत्यक्ष किती नुकसान झाले आहे, याचा अंदाज घेतला. पाहणीनंतर मंत्र्यांनी जायकवाडी धरण १०० टक्के भरल्यामुळे जलपूजन केले.