छत्रपती संभाजीनगरच्या कमलगिरी महाराजांचा २०० फूट खोल दरीत कोसळून मृत्‍यू, सिल्लोडच्या मुर्डेश्वर डोंगरावर घडली दुर्घटना

By City News Desk

On 06 Feb 2026

छत्रपती संभाजीनगरच्या कमलगिरी महाराजांचा २०० फूट खोल दरीत कोसळून मृत्‍यू, सिल्लोडच्या मुर्डेश्वर डोंगरावर घडली दुर्घटना

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

सिल्लोड (मेट्रोपोलिस पोस्ट वृत्तसेवा) : छत्रपती संभाजीनगर शहरातील जटवाडा रोडवरील हरिओमनगर येथील श्री कमलगिरी मठाचे राजू बाबूराव राजगुरे ऊर्फ कमलगिरी महाराज (वय ५८) या दोनशे फूट खोल दरीत कोसळून मृत्‍यू झाला आहे. ते आयुर्वेदिक वनस्पतीच्या शोधात सिल्लोड तालुक्यातील केळगावजवळील मुर्डेश्वरच्या डोंगरावर आले होते, पाय घसरून दरीत कोसळले. ही दुर्दैवी घटना गुरुवारी (५ फेब्रुवारी) सकाळी आठच्या सुमारास घडली.

कमलगिरी महाराज श्री क्षेत्र मुर्डेश्वरपासून ३ कि.मी. अंतरावरील मुर्डेश्वर डोंगरावर वनौषधी शोधात आले होते. याचदरम्यान पाय घसरून ते दोनशे फूट खोल दरीत कोसळले. त्यांच्या हाता-पायांसह पूर्ण शरीराला गंभीर दुखापत होऊन रक्तबंबाळ झाले होते. दरीत अडकलेल्या महाराजांनी पत्नी व मुलगा वैभवला मोबाइलवरून संपर्क केला. मुलगा घटनास्‍थळी येण्यास दुपारचे ३ वाजले.

त्याआधीच घटनेची माहिती मिळाल्याने मदतीसाठी अनेक लोक धावून आले. मात्र, अतिशय दुर्गम व अवघड भूभाग असल्याने बचावकार्याला विलंब होत गेला. मुर्डेश्वर येथील एकनाथ कोठाळे, समाधान कोठाळे व सीताराम इवरे हे दरीत उतरले. महाराज पूर्णतः शुद्धीत होते. सकाळी ९ ला दरीत कोसळलेल्या महाराजांना बाहेर काढण्यास दुपारचे ४ वाजले. ते दोन लिटर पाणी प्यायले. ते रक्तबंबाळ होते. रुग्णवाहिकेतून सिल्लोडच्या ग्रामीण रुग्णालयात नेत असतानाच त्यांचा मृत्यू झाला. त्यांच्या पश्चात पत्नी, दोन मुले, मुलगी, सुना, नातवंडे, असा परिवार आहे.