आम्ही डॉन आहोत डॉन... रामनगरमध्ये ४ शाळकरी मुले कोयता दाखवून येणाऱ्या जाणाऱ्या धमकावत होती!; २ मुले पोलिसांच्या ताब्यात, दोघांचा शोध सुरू

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरातील नशेखोरी आता तरुणांपर्यंतच मर्यादित राहिली नाही, ती शाळकरी मुलांमध्ये पसरली आहे. अल्पवयीन मुले नशेच्या अधीन जाऊन धारदार शस्‍त्रे दाखवून धमकावत असल्याचा धक्कादायक प्रकार रामनगरमध्ये बुधवारी (४ फेब्रुवारी) दुपारी १ च्या सुमारास घडला. आम्ही डॉन आहोत डॉन, असे म्हणून ही मुले येणाऱ्या जाणाऱ्या महिला, मुलांना धमकावत होते.

नागरिकांनी नगरसेवक मनोज गांगवे यांना कळवल्यानंतर त्यांनी त्या ठिकाणी धाव घेतली. मात्र तोपर्यंत नशेखोर मुले निघून गेली होती. गांगवे यांनी मुकुंदवाडी पोलीस ठाण्याचे पोलीस निरीक्षक सचिन इंगोले यांना कळवले. त्यानंतर गुरुवारी (५ फेब्रुवारी) पोलिसांनी दोन अल्पवयीन मुलांना ताब्यात घेतले. नागरिकांच्या माहितीनुसार, १७ व १६ वर्षीय दोन मुले रामनगर परिसरातच राहतात. त्यांच्यासह ६ ते ७ नशेखोर मुले रस्‍त्‍याने शस्‍त्रे घेऊन फिरत असतात.

लोकांना धमक्या देतात. नशा करतात. बुधवारी दुपारी १ ला चौघे रामनगरमध्ये एका किराणा दुकानाजवळ उभे होते. येणाऱ्या जाणाऱ्यांना धारदार कोयता दाखवून धमकावत होते. एका नागरिकाने त्यांचा व्हिडीओ घेण्याचा प्रयत्‍न केला असता काय व्हिडीओ काढतो रे, आम्ही डॉन आहोत डॉन... असे ही मुले म्हणाली. पोलिसांनी पकडलेली दोन्ही मुले इंग्रजी माध्यमाच्या शाळेत शिकतात. त्यांच्याकडे पालकांचे इतके दुर्लक्ष झाले आहे, की ती मुले अल्पवयात गुंडगिरीचे धडे गिरवत आहेत.

शाळकरी मुले बनली ड्रग्ज सप्लायर..?
शाळकरी मुलांवर कुणाचा संशय जात नसल्याने घरात बिघडलेली मुले जाळ्यात ओढून त्यांना ड्रग्‍ज सप्लायर म्हणून ड्रग्‍ज माफिया वापरत असल्याची चर्चा परिसरात आहे. या प्रकारामुळे मुलांच्या सुरक्षेबाबत पालकांत चिंता निर्माण झाली असून, त्यांनी आपल्या पाल्यांकडे अधिक लक्ष देण्याची गरज निर्माण झाली आहे. आपल्या पाल्याचे मित्र कोण मित्र आहेत, त्यांचे वर्तन- स्वभाव कसे आहेत, ते कधी कुठे असतात, याबाबत पालकांनी जागरूक राहण्याची गरज आहे.