गंगापूर (मेट्रोपोलिस पोस्ट वृत्तसेवा) : शेकडो रुग्णांचे प्राण वाचवणारे रुग्णवाहिका चालक कल्याण दगडू कलापुरे (वय ४८) यांचा हार्टॲटॅकने मृत्यू झाला. भाच्याचे लग्न असल्याने आनंदात होते, आदल्या दिवशी हळदीच्या कार्यक्रमात मनसोक्त नाचले.. घरी आले, दुसऱ्या दिवशी विवाह असल्याचा आनंद ऊरी बाळगून झोपी गेले, मात्र उठलेच नाहीत... ही दुर्दैवी घटना गंगापूर तालुक्यातील उत्तरवाडी येथे बुधवारी (२५ फेब्रुवारी) सकाळी समोर आली.
कल्याण कलापुरे यांच्या वैजापूर तालुक्यातील वक्ती पानवी येथील भाच्याचा विवाह बुधवारी (२५ फेब्रुवारी) गंगापूरला होता. मंगळवारी रात्री उशिरापर्यंत लाडक्या भाच्याच्या हळदीचा कार्यक्रमात ते उत्साहात सहभागी झाले. त्यानंतर उत्तरवाडी येथील घरी परतले. त्यांची पत्नी व मुले लग्नासाठी आधीच बहिणीच्या घरी मुक्कामी असल्याने ते रात्री एकटेच होते. बुधवारी सकाळी नऊपर्यंत दरवाजा न उघडल्याने पुतण्याने शेजाऱ्यांच्या मदतीने दरवाजा तोडला. कल्याण यांचा बेडवरच मृतदेह आढळला.
बुधवारी पहाटे त्यांना हार्टॲटॅक आला आणि वेळीच मदत न मिळाल्याने मृत्यू झाला. गंगापूर उपजिल्हा रुग्णालयातील डॉक्टरांनी त्यांना तपासून मृत घोषित केले. कलापुरे हे समृद्धी महामार्गावर रुग्णवाहिकाचालक म्हणून कार्यरत होते. अनेकांचे प्राण त्यांनी वाचवले. पण शेवटच्या क्षणी त्यांच्या मदतीला कुणी नव्हते. मामाच्या निधनाची बातमी धडकताच लग्नमंडपावर दुःखाचे सावट निर्माण झाले. सनई-चौघडे वाजायचे थांबले. भयाण शांतता पसरली. दुपारी ४ वाजता उत्तरवाडी येथे कलापुरे यांच्यावर अंत्यसंस्कार करण्यात आले. त्यांच्या पश्चात पत्नी, दोन मुले, दोन भाऊ असा परिवार आहे.
