छत्रपती संभाजीनगर (मेट्रोपोलिस पोस्ट वृत्तसेवा) : क्रांती चौकातील उड्डाणपुलावरून कोसळून ३० वर्षीय तरुण गंभीर जखमी झाला. छत्रपती शिवरायांच्या पुतळ्याच्या पायथ्याशी तो पडला. पोलिसांनी तत्काळ रुग्णालयात नेल्यामुळे त्याचे प्राण वाचले. त्याचे नाव प्रदीप परते (३०, रा. मध्य प्रदेश) असे आहे. ही घटना बुधवारी (२५ फेब्रुवारी) सायंकाळी पाचच्या सुमारास घडली.
पोलीस सूत्रांनी दिलेल्या माहितीनुसार, प्रदीप सहा दिवसांपूर्वी पुण्याला जातो, असे सांगून घरातून बाहेर पडला होता. मात्र पुण्याऐवजी तो छत्रपती संभाजीनगरला आला. त्याची मानसिक स्थिती ठीक नसल्याने आणि खिशात पैसे नसल्याने उपासमार होत होती. कुटुंबीयांनी तो हरवल्याचे त्याचा शोध सुरू केला होता. त्याला शोधत त्याचे मित्रही छत्रपती संभाजीनगर शहरात आले होते. बुधवारी सायंकाळी पाचच्या सुमारास प्रदीप अचानक क्रांती चौक उड्डाणपुलावरून कोसळला. पुलाखाली कर्तव्यावर असलेले वाहतूक शाखेच्या पोलिसांनी तत्काळ डायल ११२ ला कळविले.
क्रांती चौक ठाण्याच्या पोलीस उपनिरीक्षक निशिगंधा म्हस्के, सहायक पोलीस उपनिरीक्षक रमेश गायकवाड, अंमलदार अनिल पवार यांनी प्रदीपला घाटी रुग्णालयात दाखल केले. वेळेत उपचार मिळाल्याने त्याचा जीव वाचला. मात्र कमरेला आणि पायाला जबर मार लागलेला आहे. पोलीस उपनिरीक्षक निशिगंधा म्हस्के यांनी प्रदीपच्या आईशी फोनवरून संपर्क साधला. प्रदीपचे मित्र त्याला शोधत छत्रपती संभाजीनगर शहरातच आल्याचे कळताच त्यांनी त्या मित्रांना घाटी रुग्णालयात बोलावून घेतले. प्रदीपचा भाऊ नागपूरहून येत आहे. प्रदीपचा जबाब नोंदवल्यानंतरच तो पुलावरून पडला की त्याने उडी मारली, हे समोर येईल. घटनेची नोंद क्रांती चौक पोलिसांनी घेतली आहे.
