छत्रपती संभाजीनगर (मेट्रोपोलिस पोस्ट वृत्तसेवा) : वर्षानुवर्षे शहागंज चमनला मुजोर हातगाडीवाल्यांनी वेढा घातला आहे. ७० टक्के रस्ता व्यापून टाकल्यानंतर वाहनधारकांशी त्यांची अरेरावी नित्याचीच आहे. पोलीस चौकीला कडी लावलेली असते, त्यामुळे या किरकोळ विक्रेत्यांचे फावते. त्यांच्या मुजोरीचा आणि दहशतीचा नमुना बुधवारी (२५ फेब्रुवारी) दुपारी चारच्या सुमारास दिसला. जो इतका धक्कादायक आहे, की शहरभर संतापाची लाट उसळली आहे. मुजोर हातगाडीवाल्यांच्या दहशतीतून शहागंज मुक्त करण्याची हीच ती वेळ असल्याची भावना व्यक्त होत आहे. मोठ्या अपेक्षेने बहुमताने निवडून आलेल्या भाजपच्या महापौर, शिंदे गटाच्या उपमहापौरांनी आता यासाठी पुढाकार घ्यावा, प्रशासनाला सक्तीने कामाला लावावे, अशी मागणी होत आहे.
मुजोर हातगाडीवाल्यांनी दुचाकीस्वार आणि त्याच्यासोबत असलेल्या ५ महिन्यांच्या गर्भवतीला अमानुष मारहाण केली. नंदिनी पगारे (वय २३) या पती प्रणव पगारे (वय २५) यांच्यासोबत दुचाकीने या भागातून जात असताना फळ विक्रेत्यांनी त्यांना धक्काबुक्की केली. प्रणव यांनी जाब विचारला असता, झुंडीने त्यांच्यावर हल्ला चढविला. नंदिनी, प्रणव यांना छत्रीचा लोखंडी पाइप, स्क्रू ड्रायव्हरने टोळके मारहाण करत होते. हा सर्व प्रकार शहागंज पोलीस चौकीच्या बाजूलाच सुरू होता. चौकीत कुणीही नव्हते. कडी लावलेली होती. उपमहापौर राजेंद्र जंजाळ यांचे काही कार्यकर्ते तिथून जात असताना त्यांनी लगेचच जंजाळ यांना कळवले. जंजाळ यांनी पोलीस आयुक्त प्रवीण पवार यांच्याशी संपर्क साधला. त्यानंतर पोलिसांनी घटनास्थळी धाव घेऊन मारहाण करणाऱ्या इम्रानसह चार जणांना अटक केली. नंदिनी व प्रणव यांना घाटी रुग्णालयात दाखल करण्यात आले. सुदैवाने नंदिनी यांच्या पोटाला गंभीर दुखापत झाली नाही. त्यांचे हे दुसरे बाळ आहे. पोटावर थोड्याशा अंतराने दुखापत झाली असती तर एक जीव जाण्याची भीती डॉक्टरांनी व्यक्त केली.
हे नित्याचेच, कठोर होऊन लगाम लावण्याची गरज...शहागंजमध्ये हातगाडीवाल्यांसह रस्त्यावर ठाण मांडून बसलेल्या किरकोळ विक्रेत्यांची दहशत नित्याचीच आहे. वाहनधारकांना अरेरावी करणे, मारहाण करणे अशा घटना वारंवार घडत असताना त्याला अंकुश लावण्यासाठी महापालिका आणि पोलिसांनी एकत्र येऊन तातडीने मोठी मोहीम हाती घेण्याची गरज आहे. आता महापालिका प्रशासन हे पोलीस प्रशासनासोबत बैठक घेऊन हातगाड्या आणि अतिक्रमणधारकांवर कारवाईची दिशा ठरवणार असल्याचे सूत्रांनी सांगितले आहे.
दरम्यान, या घटनेबाबत उपमहापौर राजेंद्र जंजाळ म्हणाले, की हातगाडीवाल्यांची मुजोरी शहागंजमध्ये वाढली असून, ते थेट नागरिकांना मारहाण करीत आहेत. रस्त्याच्या मध्यभागापर्यंत हातगाड्या लागलेल्या असतात. सर्व अतिक्रमित हातगाड्या हटविण्याची सूचना मनपा आयुक्तांना केली आहे.
दरम्यान, एमआयएमला या मुजोर हातगाडीवाल्यांचा पुळका आला आहे. महापालिकेतील विरोधी पक्षनेते अब्दुल समीर म्हणाले, की हातगाड्या व अतिक्रमणांवर कारवाईसाठी आमचा पाठिंबा आहे. मात्र रमजान महिना सुरू असल्याने कारवाई करू नये. त्यानंतर होणाऱ्या कारवाईला आमचा पाठिंबा असेल.
-दाम्पत्याला केलेल्या मारहाण प्रकरणी सिटी चौक पोलिसांनी गुन्हा दाखल करून ४ जणांना अटक केल्याची माहिती पोलीस निरीक्षक निर्मला परदेशी यांनी दिली आहे. अब्दुल समीर यांची पथकाला अरेरावी...
महापालिकेत ३३ नगरसेवकांचे बळ घेऊन बसलेल्या एमआयएमचा मुजोर हातगाडीवाल्यांना सरळ सरळ पाठिंबा असल्याचेच दिसून येत आहे. महापालिका अतिक्रमण निर्मूलन विभागाचे पथक मंगळवारी दुपारी शहागंजमध्ये कारवाईसाठी गेले असता विरोधी पक्षनेते अब्दुल समीर यांनी या पथकाला अरेरावी केली व माघारी जाण्यास भाग पाडले. त्यानंतर या मुजोर हातगाडीवाल्यांनी समीर यांचा सत्कार केल्याचे सांगण्यात येते.
