सिल्लोड (मेट्रोपोलिस पोस्ट वृत्तसेवा) : पुढे धावणाऱ्या १० टायरी ट्रकची मागची दोन चाके अचानक निखळली अन् मागून येणाऱ्या दुचाकीस्वारावर धडकली. यात गंभीर जखमी दुचाकीस्वाराचा उपचारासाठी नेताना मृत्यू झाला. ही विचित्र घटना सिल्लोड-भोकरदन रस्त्यावरील सोयगावदेवी पाटीजवळ बुधवारी (२५ फेब्रुवारी) दुपारी १२ च्या सुमारास घडली. राजू बाबुराव दुधे (वय ४८, रा. खोडकाईवाडी, ता. सिल्लोड) असे मृत्यू झालेल्याचे नाव आहे.
राजू दुधे भोकरदनच्या खासगी कंपनीत नोकरी करत होते. दुचाकीने (क्र. एमएच २० जीए ७०७५) सिल्लोडकडून भोकरदनकडे जात असताना त्यांच्यापुढे लोडिंग ट्रक (क्र. आरजे ०२ जीसी ६०६१) जालन्याच्या दिशेने जाण्यासाठी धावत होता. अचानक या ट्रकचे एक्सल तुटून मागील दोन टायर निखळले. मागे असलेल्या राजू दुधे यांच्या दुचाकीला येऊन धडकले. या धडकेमुळे दुधे दुचाकीवरून जोरात पडले. त्यांच्या डोक्याला गंभीर दुखापत झाली. नागरिकांनी तातडीने पोलिसांना कळवले. पोलिसांनी दुधे यांना भोकरदन येथील ग्रामीण रुग्णालयात दाखल केले.
मात्र, प्रकृती चिंताजनक असल्याने डॉक्टरांनी त्यांना छत्रपती संभाजीनगर येथील घाटी रुग्णालयात नेण्याचा सल्ला दिला. रुग्णवाहिकेतून छत्रपती संभाजीनगरला आणत असतानाच फुलंब्रीजवळ त्यांची प्राणज्योत मालवली. भोकरदन पोलिसांनी ट्रकचालकाविरुद्ध गुन्हा दाखल केला आहे. ट्रक जप्त केला आहे. राजू दुधे यांच्या पश्चात पत्नी, आई, दोन मुली आणि एक मुलगा असा परिवार आहे. बुधवारी (२५ फेब्रुवारी) सायंकाळी ७ वाजता खोडकाईवाडी येथील स्मशानभूमीत त्यांच्यावर अंत्यसंस्कार करण्यात आले.
