छत्रपती संभाजीनगर (मेट्रोपोलिस पोस्ट वृत्तसेवा) : लाचखोरीची कीड डोक्यात न गेल्याने ६१ वर्षीय नंदकिशोर आसाराम चव्हाण (रा. पडेगाव) याने हद्दच केली. जिल्हा परिषदेच्या पाणीपुरवठा विभागातून कनिष्ठ सहायक पदावरून सेवानिवृत्त झालेला हा महाभाग जिल्हा परिषदेत लाच खाण्यासाठी येतच होता. जिल्हा परिषद बांधकाम विभागामार्फत शासकीय कामांची ठेकेदारी करण्यासाठी लागणारे नोंदणी प्रमाणपत्र (लायसन्स) काढून देण्यासाठी एका तरुणाकडून १० हजार रुपयांची लाच घेताना चव्हाणला लाचलुचपत प्रतिबंधक विभागाने रंगेहात पकडले.
क्रांती चौक पोलीस ठाण्यात गुन्हा दाखल करण्याबरोबरच एसीबीने चव्हाणच्या घराची झडतीही घेतली. झडतीचा तपशील अद्याप समोर आलेला नाही. एसीबीच्या माहितीनुसार, २१ वर्षांच्या तरुणाने कन्स्ट्रक्शन सुपरवायझरचा कोर्स केलेला असून, त्याला जिल्हा परिषद बांधकाम विभागाचे नोंदणी प्रमाणपत्र हवे होते. यासाठी त्याने १ जानेवारी २०२६ ला अर्ज केला होता. २४ फेब्रुवारीला तरुण आणि त्याचा मित्र जिल्हा परिषद कार्यालयात आले असता चव्हाणने लायसन्स काढून देतो, असे सांगून प्रत्येकी ७ हजार रुपये याप्रमाणे एकूण १४ हजार रुपये मागितले. तरुणाला लाच देण्याची इच्छा नव्हती. त्याने एसीबी कार्यालयात तक्रार केली. २५ फेब्रुवारीला लाचेच्या मागणीची पडताळणी करण्यात आली. तडजोडीनंतर दोन्ही फाइल्ससाठी १० हजार रुपये देण्याचे ठरले. बुधवारी (२५ फेब्रुवारी) दुपारी जिल्हा परिषद कार्यालयाच्या गेटसमोरच चव्हाणने लाच घेतली. त्याचबरोबर एसीबीच्या पथकाने त्याच्यावर हल्लाबोल केला. त्याला ताब्यात घेतले.
