पैठणमध्ये अतिक्रमणे हटवताना पोलिसांशी व्यापाऱ्यांचा वाद; काही मिनिटांत बाजारपेठ झाली बंद..., पुढे काय घडलं...

पैठण (मेट्रोपोलिस पोस्ट वृत्तसेवा) : एकीकडे कामगारांचा देशव्यापी बंद सुरू असताना पैठणमध्ये मात्र वेगळ्याच कारणासाठी व्यापाऱ्यांचा बंद पाहायला मिळाला. शहरातील कोर्ट रॉड परिसरात अतिक्रमण हटाव मोहीम सुरू असताना व्यापाऱ्यांचा पोलिसांशी वाद झाला. यानंतर व्यापाऱ्यांनी बाजारपेठ आणि बसस्थानक चौकातील दुकाने बंद ठेवून पोलिसांसह नगर परिषद प्रशासनाचा निषेध केला.

येत्या ५ ते ९ मार्च या कालावधीत पैठण शहरात शांतिब्रह्म संत एकनाथ महाराज यांचा नाथषष्ठी सोहळा पार पडणार आहे. नेहमीप्रमाणे या सोहळ्यासाठी राज्यभरातून लाखो भाविक पैठण नगरीत येत असतात. यंदाही या सोहळ्यासाठी भाविकांची गर्दी होण्याची शक्यता लक्षात घेऊन या भाविकांची गैरसोय टाळण्यासह शहरातील रस्ते मोकळे करण्याच्या हेतूने नगर पालिकेने शहरात अतिक्रमण हटाव मोहीम हाती घेतली आहे. बुधवारपासून सुरू असलेल्या या मोहिमेचे नेतृत्व न. प. मुख्याधिकारी डॉ. पल्लवी अंभोरे या करीत आहेत. गुरुवारी पोलीस बंदोबस्तात न.प.चे पथक बाजारपेठ परिसरात अतिक्रमण पाडण्यासाठी दाखल झाले. उपमुख्याधिकारी सोमनाथ गर्जे यांच्यासह पालिकेच्या मोठ्या फौजफाट्याचा यात समावेश होता. काही गडबड होऊ नये म्हणून पोलिसांचा बंदोबस्तही सोबत होता.

कारवाई सुरू होताच एका व्यापाऱ्याने अतिक्रमण पाडण्यास विरोध केला आणि यातून त्याचा पोलिसांशी वादही झाला. यामुळे तणाव निर्माण झाला. यानंतर परिसरातील सर्वच व्यापारी एकत्र आले आणि त्यांनी बंदचे अस्त्र उगारले. काही क्षणांतच बाजारपेठ व बसस्थानक परिसरातील दुकाने बंद झाली. बराच वेळ हा बंद चालल्यानंतर व्यापाऱ्यांच्या शिष्टमंडळाने तहसीलदारांची भेट घेतली. त्यांना निवेदन देऊन अतिक्रमण हटाव मोहीम तत्काळ थांबवण्याची मागणी केली. अखेर यात मुख्याधिकारी डॉ. अंभोरे यांनी मध्यस्थी केली. शेवटी व्यापाऱ्यांनी स्वतःहून अतिक्रमणे काढून घेण्याची तयारी दर्शवली. यानंतर डॉ. अंभोरे यांनीही अतिक्रमण हटाव मोहीम दोन दिवस स्थगित करण्याची घोषणा केली. यामुळे तणाव निवळला. असे असले तरी सध्या शहरात तणावपूर्ण शांतता आहे.