छत्रपती संभाजीनगरमध्ये काँग्रेस, डाव्यांचा बंदलाच ‘असहकार’; संमिश्र प्रतिसादाचा दावा, प्रत्यक्षात ठेंगा!

छत्रपती संभाजीनगर (मेट्रोपोलिस पोस्ट वृत्तसेवा) : केंद्र सरकारच्या नवीन कामगार कायद्यांच्या विरोधात पुकारण्यात आलेल्या देशव्यापी बंदला छत्रपती संभाजीनगरमध्ये कामगार, कंपन्यांनी एकप्रकारे असहकारच केला. संमिश्र प्रतिसाद मिळाल्याचा दावा करण्यात आला असला तरी, प्रत्यक्षात चिकलठाणा, शेंद्रा तसेच वाळूज एमआयडीसी परिसरातील अनेक कंपन्या सुरूच होत्या, कामगारही कामावर होते. त्यामुळे बंदला ठेंगाच दाखविण्यात आला.

देशव्यापी बंदच्या निमित्ताने शहर व परिसरातील कामगार व कर्मचारी संघटनांच्या संयुक्त कृती समितीच्या वतीने क्रांती चौक परिसरात महाधरणे आयोजित केली होती. त्यातील ‘महा’ शब्द निघून केवळ धरणे हा शब्द संयुक्तीक ठरेल, असा प्रतिसाद मिळाला. आंदोलनकर्त्यांनी केंद्र सरकारचा निषेध नोंदवला. साथी सुभाष लोमटे यांनी आंदोलनाचे नेतृत्व केले. सिटू, आयटक, इंटक, मराठवाडा लेबर युनियन, भारतीय कामगार सेना, ऑल इंडिया बँक एम्प्लॉईज असोसिएशन, एलआयसी कर्मचारी युनियन, एकटु, एमएसईबी वर्कर्स फेडरेशन, सरकारी कर्मचारी मध्यवर्ती संघटना, जिल्हा परिषद कर्मचारी महासंघ, हमाल माथाडी महासंघ, सर्व श्रमिक संघ, बीएसएनएल कर्मचारी युनियन, महाराष्ट्र राज्य लालबावटा शेतमजूर युनियन, शेतकरी शेतमजूर संघटना, अंगणवाडी कर्मचारी, आशा स्वयंसेविका, आरोग्य परिचर अशा विविध संघटनाचे सदस्य मोठ्या संख्येने या महाधरणे आंदोलनात सहभागी झाले होते. आंदोलनाचे नंतर सभेत रूपांतर झाले. या सभेला साथी सुभाष लोमटे, काँग्रेसचे जिल्हाध्यक्ष किरण पाटील डोणगावकर, जगन्नाथ काळे, रमेशभाई खंडागळे, को. देविदास तुळजापूरकर, को. राम बाहेती, को. लक्ष्मण साक्रूडकर, प्रभाकर मते पाटील, को. श्रीकांत फोफसे, को. रंजन दाणी, भीमराव बनसोड, बुद्धिनाथ बराळ आदींनी संबोधित केले.