चालकाला डुलकी, वऱ्हाड घेऊन जाणारा ट्रक विजेच्या खांबाला धडकून महिलेचा मृत्यू, ८ गंभीर जखमी, सिल्लोड तालुक्यातील दुर्घटना

सिल्लोड (मेट्रोपोलिस पोस्ट वृत्तसेवा) : वऱ्हाडींना घेऊन जाणारा ट्रक विजेच्या खांबावर धडकून एका महिलेचा जागीच मृत्यू तर ८ वऱ्हाडी गंभीर जखमी झाले. ही घटना शुक्रवारी (२० फेब्रुवारी) पहाटे ३:३० च्या सुमारास वांगी बुद्रूकजवळील (ता. सिल्लोड) आंबा फाट्यावर घडला. विद्युत तारा ट्रकवर पडल्याने ३५ वऱ्हाडींच्या जिवाला धोका निर्माण झाला होता. गस्तीवरील पोलिसांनी धाव घेऊन तारा बाजूला केल्या. अन्यथा मोठी जीवितहानी झाली असती.

रेखाबाई वसंत गोसावी (रा. बोदवड, जि. जळगाव) असे मृत्यू झालेल्या महिलेचे नाव आहे. श्रीरामपूरला लग्नासाठी जळगावचे वऱ्हाड घेऊन आयशर ट्रक (क्र. एमएच १९ सीएक्स ३२५४) शुक्रवारी पहाटे जात होता. चालकाला डुलकी लागल्याने ट्रक रस्त्याखाली उतरून विजेच्या खांबाला धडकला. खांब आडवा होऊन तारा तुटून ट्रकवर पडल्या. तारांचे ट्रकवर घर्षण होऊन स्पार्किंग होऊ लागली. यामुळे ट्रकमधील ३५ वऱ्हाडी घाबरून आरडाओरड करू लागले. याच वेळी गस्तीवरील पोलिसांनी त्यांच्याकडे धाव घेतली. सिल्लोड ग्रामीण पोलीस ठाण्याचे पोलीस निरीक्षक रवींद्र ठाकूर हेही कळताच सहकाऱ्यांसह घटनास्‍थळी आले.

पोलिसांनी तत्काळ लाकडाच्या मदतीने ट्रकवरील विजेच्या तारा बाजूला केल्या. वायरमनशी संपर्क करून वीजपुरवठा खंडित केला. ट्रकमध्ये अडकलेली लहान मुले, महिला, ज्येष्ठ नागरिकांसह ३५ वऱ्हाडींना सुरक्षित बाहेर काढले. जखमींना सिल्लोडच्या उपजिल्हा रुग्णालयात दाखल केले. अपघातानंतर आयशर वाहनाचा चालक पळून गेला. सिल्लोड ग्रामीण पोलिसांनी त्याच्याविरुद्ध गुन्हा दाखल केला आहे. जखमींपैकी रेखाबाई गोसावी यांचा मृत्यू झाला असून, ब्रह्मा गोसावी, प्रमिलाबाई गोसावी, सविता गोसावी, निर्मलाबाई गोसावी, सरुबाई गोसावी, वसंताबाई कोळी, ममता कोळी (रा. शेलगाव, ता. जामनेर, जि. जळगाव), सुरेश गोसावी (रा. मुक्ताईनगर, जि. जळगाव) हे ८ प्रवासी गंभीर जखमी झाले आहेत.