७ वर्षीय चिमुकलीवर सावत्र पित्‍याकडून अत्याचाराचा प्रयत्‍न, वाळूज MIDC तील घटनेने संतापाची लाट उसळली, महिलांनी एकत्र येऊन नराधमाला दिला चोप, पोलिसांकडून प्रकरण दडपण्याचा प्रयत्‍न?

छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसी परिसरातील तिसगाव भागात ७ वर्षांच्या चिमुकलीवर सावत्र वडिलानेच लैंगिक अत्याचाराचा प्रयत्न केल्याची संतापजनक घटना शुक्रवारी (२० फेब्रुवारी) सायंकाळी समोर आल्याने संतापाची लाट उसळली आहे. मुलीच्या प्रसंगावधानामुळे आणि शेजाऱ्यांच्या धाडसामुळे नराधमाचा प्रयत्‍न फसला. या घटनेची माहिती द्यायला सुरुवातीला पोलीस नकारच देत होते. नंतर जेव्हा पत्रकारांनी स्वतःहून घटनास्‍थळावरून माहिती घेतली तेव्हा पोलिसांनी ही घटना गांभीर्याने घेत पावले उचलली, अशी चर्चा आहे.

नक्की काय घडलं?
पीडित चिमुकलीच्या आईने दुसरे लग्न केले असून, तिची आई आणि सावत्र वडील मजुरी करतात. घटनेवेळी आई घराबाहेर गेली होती. मद्यधुंद सावत्र वडिलाने घरात  चिमुकलीला एकटे पाहून तिचे कपडे काढून मांडीवर बसवले. नराधमाने अश्लील चाळे सुरू करताच घाबरलेल्या चिमुकलीने आरडाओरड केली. तरीही तो तिला सोडत नव्हता. तिने त्याच्या हाताला जोरात चावा घेतला आणि घराबाहेर पळ काढला. ती थेट शेजाऱ्यांच्या घरात धावत गेली. परिसरातील महिलांनी एकत्र येत नराधमाला पकडून चोप दिला आणि पोलिसांना कळवले.

घटनेची माहिती मिळताच वाळूज एमआयडीसी पोलिसांनी घटनास्थळी धाव घेतली. मुलीची वैद्यकीय तपासणी करण्यात आली असून, तिच्या अंगावर जखमा आणि चाव्याच्या खुणा आढळल्या आहेत. नराधमाविरुद्ध पॉक्सो कायद्याअंतर्गत गुन्हा दाखल करण्यात येऊन अटक करण्यात आली. अधिक तपास पोलीस उपनिरीक्षक सुषमा पवार करत आहेत. मुलीला बालकल्याण समितीकडे सुपूर्द करण्याची प्रक्रिया सुरू आहे.
पोलिसांकडून माहिती देण्यास टाळाटाळ
दरम्यान, या संवेदनशील घटनेची माहिती देण्यास पोलीस टाळाटाळ करत होते. यामागे पोलिसांची काय भूमिका होती, हे कळू शकले नाही. मात्र प्रकरण पत्रकारांपर्यंत गेल्याने तातडीने गंभीर पावले उचलण्यात आली, अशी चर्चा सुरू आहे.