Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : पोलीस भरतीत धावताना २३ वर्षीय तरुण कोसळला आणि त्याचा जागीच मृत्यू झाला. ही दुर्दैवी घटना आज, २१ फेब्रुवारीला सकाळी सुमारे ८.१५ वाजता ग्रामीण पोलीस अधीक्षक कार्यालयाच्या मैदानावर घडली.
संग्राम धोंडीराम शिंदे (वय २३, मूळ रा. सांगली) असे मृत्यू झालेल्या तरुणाचे नाव असून, तो १६०० मीटर धावताना चक्कर येऊन कोसळला. संग्रामला तत्काळ घाटी रुग्णालयात हलविण्यात आले. मात्र उपचारापूर्वीच त्याचा मृत्यू झाल्याचे सांगण्यात आले. संग्रामचे पोलीस दलात भरती होण्याचे त्याचे स्वप्न होते. त्यासाठी त्याने कठोर सरावही केला होता. १६०० मीटर धावण्याच्या चाचणीत काही अंतर पार केल्यानंतर त्याला अचानक चक्कर आली.
धावत असतानाच तो मैदानावरच बेशुद्ध होऊन कोसळला. उपस्थित पोलीस अंमलदार, वैद्यकीय पथकाने तत्काळ प्राथमिक उपचार करून त्याला घाटी रुग्णालयात हलविले. मात्र डॉक्टरांनी तपासून मृत घोषित केले. घटनेमुळे भरती प्रक्रिया काही काळ थांबली होती. संग्रामच्या कुटुंबाची परिस्थिती हालाखीची आहे. प्राथमिक अंदाजानुसार हृदयविकाराचा झटका किंवा तीव्र शारीरिक ताणामुळे त्याचा मृत्यू झाल्याचे सांगण्यात आले. मात्र अधिकृत कारण शवविच्छेदन अहवालानंतरच स्पष्ट होणार आहे.
.jpg)
