महत्त्वाची बातमी : छ. संभाजीनगरात ‘म्हाडा’ सोडत अर्ज भरण्यास ८ सप्टेंबरपर्यंत मुदतवाढ

छत्रपती संभाजीनगर (सीएससीएन वृत्तसेवा) : छत्रपती संभाजीनगर गृहनिर्माण व क्षेत्रविकास मंडळाने म्हाडा सोडतीच्या अनुषंगाने जास्तीत जास्त नागरिकांना या संधीचा लाभ घेता यावा यासाठी अर्ज भरण्यास ८ सप्टेंबरपर्यंत मुदतवाढ देण्यात आली आहे, असे गृहनिर्माण व क्षेत्रविकास मंडळाचे मुख्य अधिकारी दत्तात्रय नवले यांनी कळविले आहे.

म्हाडाच्या १३४१ सदनिका भूखंडाच्या जून-२०२५ प्रसिद्ध केलेल्या जाहिरातीच्या अनुषंगाने नक्षत्रवाडी, अंबाजोगाई, चिकलठाणा, सातारा, देवळाई येथील विविध योजनेतील अर्ज भरण्यासाठी म्हाडाने ८ दिवसांची मुदतवाढ दिली आहे. त्यामुळे अर्जदारांना ८ सप्टेंबर रात्री. ११.५९ वाजेपर्यंत ऑनलाईन पद्धतीने अनामत रकमेचा भरणा करून ऑनलाईन अर्ज सादर करता येणार आहे. या जाहिरातीच्या अनुषंगाने प्राप्त होणाऱ्या अर्जांची सोडत १ ऑक्टोबर २०२५ रोजी जिल्हा नियोजन समिती सभागृह, जिल्हाधिकारी कार्यालय, छत्रपती संभाजीनगर येथे सोडत काढण्यात येणार आहे.

ऑनलाईन अर्ज भरण्याकरिता अर्जदारांनी https://housing.mhada.gov.in किंवा https://www.mhada.gov.in या संकेतस्थळास भेट द्यावी. या सोडतीकरिता मंडळातर्फे अर्ज नोंदणीकरिता- ०२२-६९४६८१००, ऑनलाईन पेमेंट करिता- १८००८९१८२९७,७०६६०४७२२२ हे हेल्पलाईन क्रमांक उपलब्ध करून देण्यात आले आहेत. तसेच अधिक माहितीसाठी support@easebuzz.in या ई-मेलवर संपर्क साधता येणार आहे. या सोडतीकरिता मंडळाने अर्जदारांकरिता विभागीय कार्यालय गृहनिर्माण भवन, सी.बी.एस. रोड, महाविर स्तंभाजवळ, छत्रपती संभाजीनगर तळमजल्यावर विशेष मदत कक्ष स्थापन केला आहे, असेही कळविण्यात आले आहे.