मिसारवाडीतील १५ वर्षीय मुलगी मानवी तस्करीच्या जाळ्यात?; पुण्याला गेली कशी, तिथून एका मैत्रिणीचे बोलणेही करून दिले, आता फोन येतोय बंद...

By City News Desk

On 31 Aug 2025

मिसारवाडीतील १५ वर्षीय मुलगी मानवी तस्करीच्या जाळ्यात?; पुण्याला गेली कशी, तिथून एका मैत्रिणीचे बोलणेही करून दिले, आता फोन येतोय बंद...

छत्रपती संभाजीनगर (सीएससीएन वृत्तसेवा) : शहरातील मिसारवाडीतून एक धक्कादायक बातमी समोर आली आहे. १५ वर्षीय मुलगी मानवी तस्करीच्या जाळ्यात अडकल्याची शक्यता वर्तवली जात आहे. २२ ऑगस्टला ही मुलगी पुण्यात मैत्रिणीकडे गेली होती. ती कशी गेली, कुणासोबत गेली, याचे कोडे उलगडलेले नाही. त्यानंतर तिने तिथल्या एका तरुणीची मैत्रिण म्‍हणून ओळख करून देत कॉलवर वडिलांशी बोलणेही करून दिले. काही दिवस मुलीने मोठ्या बहिणीशी कॉलवर संवादही साधला. मात्र २७ ऑगस्टपासून मुलीचा मोबाइल बंद येत आहे. भांबावलेल्या पित्‍याने सिडको पोलीस ठाण्यात धाव घेऊन तक्रार दिली आहे. पोलिसांनी अपहरणाचा गुन्हा दाखल करून तपास सुरू केला आहे.

मिसारवाडीतील अक्सा मशिदीजवळ राहणाऱ्या व्यक्‍तीने या प्रकरणी सिडको पोलीस ठाण्यात तक्रार दिली आहे. अपहरण झालेली त्‍यांची तिसऱ्या क्रमांकाची मुलगी आहे. तिचे शिक्षण बंद असून घरीच असते. २२ ऑगस्टला दुपारी चारला ती आईला मैत्रिणीकडे जात असल्याचे सांगून घराबाहेर पडली. त्यानंतर रात्री ९ ला तिला कॉल केला असता तिने उचलला नाही. त्यामुळे मुलीच्या शेजारी राहणाऱ्या मैत्रिणीला कॉल करायला सांगितले असता तिचा कॉल मुलीने उचलला व सांगितले, की मी मैत्रिणीकडे पुण्यात आहे. दोन-तीन दिवसांत परत येते. त्याचवेळी पुण्याच्या त्या मैत्रिणीसोबत मुलीचे वडीलही फोनवर बोलले. त्यानंतर मोठ्या बहिणीसोबतही मुलगी बोलत राहिली. मात्र २७ ऑगस्टपासून तिचे बोलणे बंद झाले. तिचा मोबाइल बंद येऊ लागला. तिचा संपर्क बंद झाल्याने अखेर तिच्या वडिलांनी सिडको पोलीस ठाण्यात धाव घेऊन तक्रार दिली. अधिक तपास पोलीस अंमलदार विद्या राठोड करत आहेत.