वाळूज MIDC चे API मनोज शिंदे यांची सहकाऱ्यांसह मिळून धडाकेबाज कामगिरी, २ कारवाया अन्‌ अडीच लाखांचा गुटखा जप्त, एकूण ५ लाखांचा मुद्देमाल जप्त

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : वाळूज एमआयडीसी पोलीस ठाण्याचे धडाकेबाज सहायक पोलीस निरीक्षक मनोज शिंदे यांनी गुटखा माफियाची पाळेमुळे उद्‌ध्वस्त करण्याच्या दृष्टीने मोठे पाऊल उचलले. सहकाऱ्यांसह मिळून त्‍यांनी दोन ठिकाणी मोठ्या कारवाया करत एकूण अडीच लाखांचा गुटखा जप्त केला असून, एकूण ५ लाख रुपयांचा मुद्देमाल जप्त केला आहे. विटावा फाटा आणि एएस क्लबजवळ या कारवाया करण्यात आल्या. त्‍यामुळे गुटखा माफियांचे धाबे दणाणले आहेत.

विटावा फाट्यावरील कारवाईत कारचालक संदीप भाऊसाहेब तंटक (वय ३९, रा. घाणेगाव ता. गंगापूर)  याच्याविरुद्ध पोलीस अंमलदार लखन घुसिंगे यांनी दिलेल्या तक्रारीवरून गुन्हा दाखल करण्यात आला असून, अटक करण्यात आली आहे. शुक्रवारी (२९ ऑगस्ट) रात्री पावणेदहाच्या सुमारास सहायक पोलीस निरीक्षक मनोज शिंदे यांनी पोलीस अंमलदार बाबासाहेब काकडे, सुरेश भिसे, संतोष बमनात, नितीन इनामे, समाधान पाटील यांना बोलावून सांगितले, की कारमधून (MH 20 FG 4180) गुटखा वाहतूक होणार असून, ही कार थोड्याच वेळात विटावा फाटा येथून जाणार आहे.

त्यानंतर वरिष्ठ पोलीस निरीक्षक रामेश्वर गाडे यांना माहिती देऊन पथक तातडीने विटावा फाटा येथे रवाना झाले. शुक्रवारी रात्री साडेदहाला विटावा फाटा येथे सापळा लावून थांबले. त्‍याचवेळी संशयित कार आली. पोलिसांनी लगेचच कारला थांबवली. कारमधून चालक संदीप तंटक उतरला. त्याने कारमध्ये गुटखा असल्याचे सांगितले. पोलिसांनी २ लाखांची अल्टो कार, १० हजारांच्या मोबाइलसह एकूण ४ लाख २ हजार ३२० रुपयांचा मुद्देमाल जप्त केला. अधिक तपास सहायक पोलीस निरीक्षक मनोज शिंदे करत आहेत.

एएस क्लबजवळ पकडला गुटखा माफिया!;
एएस क्लबजवळ सापळा रचून वाळूज एमआयडीसी पोलिसांनी गुटखा माफियाच्या मुसक्या आवळल्या आहेत. त्‍याला गुटखा पुरवणारा आणि त्‍याच्याकडील दुचाकीच्या मालकाविरुद्धही गुन्हा दाखल करण्यात आला आहे. ही कारवाई गुरुवारी (२८ ऑगस्ट) रात्री साडेअकराच्या सुमारास करण्यात आली. उमेश शामलाल मालपाने (वय ३३, रा. वावडे चाळ, मनमाड, ता. नांदगाव, जि. नाशिक), पुरवठादार जावेद भाई (पूर्ण नाव माहीत नाही, रा. अहिल्यानगर), वाहनमालक जितेंद्र उर्फ बंटी नरेंद्र चांडक (वय ३९) अशी संशयितांची नावे आहेत. उमेशला पोलिसांनी अटक केली आहे. अन्न सुरक्षा अधिकारी प्रशांत शशिकांत कुचेकर (वय ३७, रा. कांचनवाडी, पैठण रोड) यांनी या प्रकरणात तक्रार दिली आहे.

गुरुवारी (२८ ऑगस्ट) वाळूज एमआयडीसी पोलीस ठाण्याचे सहायक पोलीस निरीक्षक मनोज शिंदे यांनी रात्री ११ ला कुचेकर यांना कॉल करून धुळे- सोलापूर हायवेवरील एएस क्लब चौकाच्या अलीकडे लिंबाच्या झाडाखाली कारवाईसाठी यायला सांगितले. त्यानंतर कुचेकर हे सहकाऱ्यांसह रात्री सव्वा अकराला तिथे गेले. संशयित दुचाकी (MH20 BV4693) रात्री ११ वाजून २० मिनिटांनी येताच पोलिसांनी अडवली. दुचाकीचालकाला कुचेकर आणि पोलीस उप निरीक्षक दिनेश बन, अंमलदार संतोष बमनाथ, वैभव गायकवाड यांनी ओळख करून दिली. वाहनचालकाने त्याचे नाव उमेश मालपाने असल्याचे सांगितले. त्याने त्याच्याकडील थैल्यांत चहापत्ती असल्याचे सांगितले. पोलिसांनी झडती घेतली असता ४० हजार रुपयांचा गुटख्याचा साठा आढळला. पोलिसांनी त्याची २० हजारांची दुचाकी आणि १० हजार रुपयांचा मोबाइल जप्त केला.