Tech News : उद्या, १ सप्टेंबरपासून पेटीएम बंद होणार आहे का? फोनवर नोटिफिकेशन, सोशल मीडियावर प्रश्नांचा वर्षाव...

पेटीएम वापरकर्त्यांना काळजी आहे की त्यांचे यूपीआय ३१ ऑगस्टपासून काम करणे थांबवू शकते. कारण गुगल प्लेने पाठवलेल्या एका नोटिफिकेशनमध्ये म्हटलेय की पेटीएम यूपीआय ३१ ऑगस्टपासून काम करू शकणार नाही. त्यामुळे खळबळ उडाली आहे. लोक सोशल मीडियावर वेगवेगळ्या गोष्टी बोलत आहेत आणि अनेक प्रकारचे बनावट संदेशदेखील व्हायरल होत आहेत. पण आता, लोकांची चिंता पाहून, कंपनीला स्वतः पुढे यावे लागले आहे. पेटीएमने यूपीआय बंद करण्याबद्दल काय म्हटले आहे ते जाणून घेऊया...

सोप्या भाषेत बदल समजून घ्या
पेटीएमने म्हटले आहे की हा बदल फक्त अशा वापरकर्त्यांना लागू होईल जे YouTube प्रीमियम, गुगल वन स्टोरेज किंवा इतर सबस्क्रिप्शनसाठी वारंवार पेमेंट करायला @paytm हँडल वापरतात. याचा सामान्य वापरकर्त्यांवर कोणताही परिणाम होणार नाही. प्रभावित वापरकर्त्यांना त्यांचे जुने @paytm हँडल @pthdfc, @ptaxis, @ptyes किंवा @ptsbi सारख्या नवीन हँडलने बदलावे लागेल. उदाहरणार्थ, जर तुमचा UPI आयडी rakesh@paytm असेल, तर आता ते rakesh@pthdfc किंवा rakesh@ptsbi (तुमच्या बँकेनुसार) असू शकतो.

ज्यांचे @paytm हँडल आहे...
@pthdfc, @ptaxis, @ptyes किंवा @ptsbi सारख्या तुमच्या बँकेशी लिंक केलेल्या नवीन Paytm UPI आयडीवर स्विच करा. गुगल पे किंवा फोनपे सारख्या इतर UPI प्लॅटफॉर्मद्वारे पैसे भरा. वारंवार पेमेंटसाठी डेबिट किंवा क्रेडिट कार्ड वापरा.

कंपनी प्रमुखांनी दिले आश्वासन
पेटीएमचे प्रमुख विजय शेखर शर्मा यांनी ग्राहकांना आश्वासन दिले की त्यांचे पैशाचे व्यवहार पूर्वीप्रमाणेच सुरळीत चालू राहतील. ३१ ऑगस्टपासूनचा बदल हा तांत्रिक प्रक्रियेचा एक भाग आहे. हा बदल नॅशनल पेमेंट्स कॉर्पोरेशन ऑफ इंडिया (NPCI) च्या मंजुरीनंतर लागू केला जात आहे. पेटीएमला थर्ड पार्टी ॲप्लिकेशन प्रोव्हायडर म्हणजेच TPAP म्हणून काम करण्याची परवानगी देण्यात आली आहे, ज्या अंतर्गत नवीन UPI हँडल सुरू करण्यात आले.

या सूचनेमुळे लोक घाबरले
गुगल प्लेने पाठवलेल्या एका सूचनेमुळे वापरकर्त्यांमध्ये भीती निर्माण झाली होती की पेटीएम यूपीआय आता उपलब्ध राहणार नाही. रिकरिंग पेमेंटसाठी यूपीआय हँडल अपडेट करण्याची अंतिम तारीख ३१ ऑगस्ट २०२५ असल्याने गुगल प्लेने ही सूचना जारी केली होती. ३१ ऑगस्टनंतर, गुगल प्लेवर @paytm यूपीआय हँडल स्वीकारले जाणार नाहीत, असे अधिसूचनेत म्हटले होते. हा नियम १ सप्टेंबर २०२५ पासून लागू होईल. अपूर्ण माहितीमुळे वापरकर्त्यांमध्ये गोंधळ निर्माण झाला होता, ज्याचे स्पष्टीकरण पेटीएमने आता दिले आहे.