वैजापूरच्या जांबरगाव टोल नाक्यावरील ऑपरेटरची मराठा आंदोलकांना अरेरावी, आक्षेपार्ह भाषा!; आंदोलकांनी टोल वसुली बंद पाडत वाहतूक केली ठप्प

By City News Desk

On 31 Aug 2025

वैजापूरच्या जांबरगाव टोल नाक्यावरील ऑपरेटरची मराठा आंदोलकांना अरेरावी, आक्षेपार्ह भाषा!; आंदोलकांनी टोल वसुली बंद पाडत वाहतूक केली ठप्प

वैजापूर (सीएससीएन वृत्तसेवा) : वैजापूर तालुक्‍यातील समृद्धी महामार्गावरील जांबरगाव टोल नाका (मुंबई एक्झिट) येथे मराठा आंदोलकांसोबत नाका ऑपरेटरने अरेरावी करत चुकीची वागणूक दिली. त्‍यामुळे संतप्त आंदोलकांनी तासभर टोलवसुली बंद पाडत वाहतूक ठप्प केली. हा प्रकार शनिवारी (३० ऑगस्ट) दुपारी १ च्या सुमारास घडला. मुंबई येथे मराठा आरक्षण आंदोलनात सहभागासाठी मराठा बांधव जात होते.

मराठा आंदोलकांमुळे समृद्धी महामार्गावर २ ते ३ कि.मी. लांब वाहनांच्या रांगा लागल्या होत्या. मुंबईला जाणाऱ्या मराठा आंदोलकांच्या वाहनांना टोल सवलत देण्यात आली आहे. तरीही शनिवारी सकाळी सातला जांबरगाव टोल नाक्यावर आंदोलकांच्या एका वाहनाला टोल लावण्यात आला. याबद्दल आंदोलकांनी विचारणा केली असता टोल नाका ऑपरेटरने आक्षेपार्ह भाषा वापरत अरेरावी करायला सुरुवात केली. त्‍यामुळे आंदोलक संतप्त झाले. त्यांनी समृद्धी महामार्गावरील वाहतूक अडवली. दोन्ही बाजूंनी वाहनांच्या तीन किलोमीटरपर्यंत रांगा लागल्या. या प्रकाराची माहिती मिळताच वैजापूर पोलीस ठाण्याचे पोलीस निरीक्षक सत्यजित ताईतवाले यांनी सहकाऱ्यांसह धाव घेतली. महामार्ग पोलीसही धावून आले. त्यांनी मराठा आंदोलकांची समजूत काढली. त्यानंतर तासभराने वाहतूक पुन्हा सुरू करण्यात आली.