स्कुटीने शाळेत आली, स्कुटी पार्क केली नंतर गायब झाली दहावीत शिकणारी मुलगी!; केंब्रिज चौकाजवळील घटना

By City News Desk

On 31 Aug 2025

स्कुटीने शाळेत आली, स्कुटी पार्क केली नंतर गायब झाली दहावीत शिकणारी मुलगी!; केंब्रिज चौकाजवळील घटना

छत्रपती संभाजीनगर (सीएससीएन वृत्तसेवा) : केंब्रिज चौकाजवळील बजरंगनगरातील खासगी शाळेतून दहावीत शिकणाऱ्या १६ वर्षांच्या मुलीचे अपहरण झाल्याची घटना गुरुवारी (२८ ऑगस्ट) दुपारी १ ला समोर आली. सिडको एमआयडीसी पोलिसांनी शुक्रवारी (२९ ऑगस्ट) अपहरणाचा गुन्हा दाखल करून मुलीचा शोध सुरू केला आहे.

सुंदरवाडी झाल्टा फाटा येथे राहणाऱ्या मुलीच्या आईने या प्रकरणात तक्रार दिली आहे. त्‍या व त्‍यांचे पती खासगी कंपनीत नोकरी करतात. त्यांना दोन मुली व एक मुलगा आहे. मोठी मुलगी १६ वर्षांची असून, दहावीत शिकते. गुरुवारी (२८ ऑगस्ट) दुपारी १२ ला ती स्कुटीने केंब्रिज चौकाजवळील बजरंगनगरातील खासगी शाळेत गेली. मात्र दुपारी १ ला तिच्या शिक्षकांचा मुलीच्या आईला कॉल आला, की तुमची मुलगी आज शाळेत आली नाही.

त्‍यामुळे मुलीच्या आई-वडिलांनी शाळेत जाऊन पाहिले असता शाळेत स्कुटी लावलेली दिसली. पण मुलगी दिसली नाही. शिक्षक व तिच्या मैत्रिणींना विचारपूस केली असता शिक्षकाने सांगितले, की मुलगी शाळेत आली होती, परंतु स्कुटी लावून कोठे निघून गेली माहीत नाही. मुलीचा नातेवाइकांकडे शोध घेतला. मात्र तिथेही ती गेली नव्हती. अखेर तिच्या आईने सिडको एमआयडीसी पोलीस ठाण्यात तिला कुणीतरी पळवून नेल्याची तक्रार दिली. त्‍यावरून पोलिसांनी अज्ञात अपहरणकर्त्याविरुद्ध गुन्हा दाखल केला आहे. अधिक तपास पोलीस अंमलदार पंडीत चव्हाण करत आहेत.