संजयनगरात जुगार अड्ड्यावर पोलिसांचा छापा, ८ जण पकडले

छत्रपती संभाजीनगर (सीएससीएन वृत्तसेवा) : छत्रपती संभाजीनगर शहरातील कैलासनगराजवळील संजयनगरात जिन्सी पोलिसांनी छापा मारून ८ जुगारी पकडले. त्‍यांच्या ताब्‍यातून ५५ हजार ८९० रुपयांचा मुद्देमाल जप्त करण्यात आला. ही कारवाई शनिवारी (३० ऑगस्ट) पहाटे दोनला (मध्यरात्री) करण्यात आली.

पोलीस अंमलदार शेख जफर शेख मोहमद यांच्या तक्रारीवरून सर्व जुगाऱ्यांविरुद्ध गुन्हा दाखल करण्यात आला आहे. ते डीबी पथकात (गुन्हे प्रकटीकरण पथक) काम करतात. शनिवारी (३० ऑगस्ट) पहाटे दोनला (मध्यरात्री) ते पोलीस उपनिरीक्षक साबेर शेख, पोलीस अंमलदार शंकपाळ, पवार, महिला पोलीस अंमलदार गदई यांच्यासह गस्त घालत असताना त्‍यांना गुप्त बातमीदारामार्फत खात्रीलायक माहिती मिळाली की, संजयनगर गल्ली नं.१ मधील एका खोलीत काही जण झन्नामन्ना जुगार खेळत आहेत. पोलिसांनी लगेचच त्‍या ठिकाणी छापा मारला. पत्राच्या बंद खोलीत  गोलाकार बसून ८ जण जुगार खेळत होते.

पोलिसांना पाहून ते हातातील पत्ते व पैसे आजूबाजूला लपवण्याचा प्रयत्न करू लागले. पोलिसांनी त्यांना जागीच थांबायला सांगितले. ही जागा अशोक नावाच्या व्यक्‍तीची असल्याचे जुगाऱ्यांनी पोलिसांना सांगितले. या ठिकाणी शेख अतिक शेख लतीफ (वय३३, रा. कैलासनगर), शेख सलमान शेख रईस (वय ३०, रा. दादा कॉलनी कैलासनगर), शेख सोहेल शेख अमीन (वय ३२, रा. मोतीकारंजा चौक), इम्रान खान हुसेन खान (वय २४, रा. संजयनगर गल्ली नं. बी-१), शेख फिरोज शेख अब्बास (वय ३२, रा. संजयनगर, गल्ली नं. १० सी), आफताब रसिद अहेमद खान (वय २१, रा. मिसारवाडी गल्ली नं. ५), शेख समीर शेख इक्बाल (वय ३२, रा. संजयनगर गल्ली नं. ए-७), सरफराज खान वाजेद खान (वय २५, रा.तक्षशीलनगर) यांना पकडून त्‍यांच्याकडून ५५ हजार ८९० रुपयांचा मुद्देमाल जप्त करण्यात आला. अधिक तपास पोलीस अंमलदार राजाराम देडवाल करत आहेत.