छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : अतिपावसानंतर आता छत्रपती संभाजीनगर शहराला अतिथंडीचा सामना यंदा करावा लागणार, असे चित्र हिवाळ्याच्या सुरुवातीच्या काळातच स्पष्ट झाले आहे. गेल्या आठवड्यापासून किमान तापमान रोज घसरत असून, आज (१० नोव्हेंबर) सकाळी तर अक्षरशः शहरवासियांना हुडहुडी भरली आहे. काल रविवारी दिवसभरात किमान तापमान १२.८ अंश सेल्सिअस नोंदविले गेले. हंगामातील आतापर्यंतचे हे सर्वात कमी तापमान ठरले. उबदार कपड्यांची मागणी आता वाढू लागली आहे.
उत्तर भारतात शीत लहरी निर्माण झाल्यामुळे मध्य भारतासह महाराष्ट्रातील किमान तापमानात कमालीची घट झाली आहे. छत्रपती संभाजीनगर शहरासह जिल्ह्यात थंडीची लाट आली आहे. गेल्या आठवड्यापासून रात्रीचे तापमान सातत्याने घटत चालले आहे. दिवसा कोरडे व सौम्य ऊन पडत असून, रविवारी छत्रपती संभाजीनगर शहराचे कमाल तापमान ३०.४ अंशांवर होते, तर किमान तापमान १२.८ अंश इतके घसरले होते. सकाळी आणि रात्री रस्त्यांवरील वर्दळ कमी झाली आहे.
थंडीपासून बचावासाठी जॅकेट, मफलर, स्वेटरसारख्या उबदार कपड्यांची खरेदी जोरात सुरू झाली आहे. १५ नोव्हेंबरपर्यंत किमान तापमान २ ते ४ अंशांनी आणखी घसरण्याची शक्यता हवामान विभागाने वर्तवली आहे. धुळे आणि जळगाव सध्या महाबळेश्वरसारखा अनुभव घेत आहे. धुळ्याचे कमाल तापमान रविवारी ८ तर जळगावचे १०.५ इतके नोंदवले गेले. महाबळेश्वरचे तापमान १२.८ इतके नोंदवले गेले. गेल्यावर्षी याच दिवशी छत्रपती संभाजीनगरचे तापमान कमाल ३२ तर किमान १८ इतके होते. यंदा थंडीने विक्रमच केला आहे.
.jpg)
.jpg)
