गोरक्षकांनी पोलिसांना सोबत घेत गाठली आरेफ कॉलनी!; गायीचे मुंडके, मांस आढळले

छत्रपती संभाजीनगर (सीएससीएन वृत्तसेवा) : गोरक्षकांना मिळालेल्या गोपनीय माहितीवरून त्‍यांनी बेगमपुरा पोलिसांना सोबत घेत रविवारी (२७ जुलै) आरेफ कॉलनीत छापा मारला. गायीचे मुंडके, कास मिळून आले. संशयिताच्या घरात दीड किलो मांसही मिळून आले. पोलिसांनी जावेद खान जाकेर खान, समीर जावेद खान, अलीम खान, सरदार कुरेशी (सर्व रा. आरेफ कॉलनी) अशा चौघांविरुद्ध गुन्हा दाखल केला आहे.

गोरक्षक नैना सुभाष राजपूत (वय ३३, रा. बजाजनगर) यांनी या प्रकरणात तक्रार दिली आहे. त्या व्यापार करून उदरनिर्वाह करतात. गोरक्षणाचे काम करताना त्यांच्यासोबत मनोज मच्छिंद्र बिडकर हेही कार्यकर्ते असतात. रविवारी दुपारी तीनला त्यांना कळले, की समीर जावेद खान, अलीम खान, सरदार कुरेशी (सर्व रा. आरेफ कॉलनी छत्रपती संभाजीनगर) हे आरेफ कॉलनीत गोवंशांची कत्तल करणार आहेत. त्यामुळे नैना राजपूत आणि मनोज बिडकर हे बेगमपुरा पोलीस ठाण्यात आले.

तिथे महिला पोलीस उपनिरीक्षक एम. जी. केदार यांना दिली. त्यानंतर सहायक पोलीस निरीक्षक लहाने, महिला पोलीस उपनिरीक्षक केदार, पोलीस अंमलदार यू. के. ठाकूर, मिर्झा यांनी कारवाईसाठी छाप्याचे नियोजन केले. आरेफ कॉलनीत दुपारी साडेचारला पोहोचले असता खाम नदीच्या पूर्व बाजूला विखुरलेल्या अवस्थेत मांस, चामडे दिसून आले. त्यामध्ये गाईचे कास व मुंडके आढळले. जावेद खान जाकेर खान याच्या घरी पथकाने छापा मारला असता दुसऱ्या मजल्यावरील गॅलरीतील फ्रिजमध्ये अंदाजे दीड किलो मांस मिळून आले. पोलिसांनी ते जप्त केले. अधिक तपास पोलीस उपनिरीक्षक सिद्दीक सय्यद करत आहेत.