पानदरिबा भागात तणाव : पोलिसांनी वेळीच धाव घेऊन परिस्थिती आणली नियंत्रणात, दंगा काबू पथक तैनात, नक्की काय झालं...

By City News Desk

On 31 Jul 2025

पानदरिबा भागात तणाव : पोलिसांनी वेळीच धाव घेऊन परिस्थिती आणली नियंत्रणात, दंगा काबू पथक तैनात, नक्की काय झालं...

छत्रपती संभाजीनगर (सीएससीएन वृत्तसेवा) : चोरीच्या उद्देशाने तरुण फिरत असल्याच्या संशयाने नागरिकांनी चौकशी केली असता, एकाने पळ काढला, तर दोघे नागरिकांच्या हाती लागले. त्‍यांना चोप देण्यात आला. ही माहिती मिळताच दुसरा गटाचे लोकही जमले. दोन्ही बाजूंनी मोठा जमाव जमल्याचे कळताच पोलिसांनी घटनास्‍थळी धाव घेतली, वरिष्ठ पोलीस अधिकारीही आले. दंगा काबू पथकाला बोलाविण्यात आले. त्‍यानंतर परिस्थिती नियंत्रणात आली. हा प्रकार धावणी मोहल्ला, पानदरिबा परिसरात बुधवारी रात्री उशिरा पावणेबाराच्या सुमारास घडला. सध्या या परिसरात तणावपूर्ण शांतता आहे.

प्रत्यक्षदर्शींच्या माहितीनुसार, ३ तरुण दुचाकीने धावणी मोहल्ला परिसरातून जात असताना त्यांनी तिथे एका दूध डेअरीसमोर बसलेल्या काही तरुणांना पत्ता विचारला. ते चोरीच्या उद्देशाने फिरत असल्याचा संशय आल्याने तरुणांनी अधिक माहिती विचारली. त्यातच दुचाकीवरील तिघांनी आक्षेपार्ह वक्‍तव्‍य केले. त्‍यामुळे वाद वाढला. दुचाकीवरील एकाने पळ काढला, तर दोघांना तरुणांनी पकडून मारहाण सुरू केली. हे कळताच दुसऱ्या गटाच्या लोकांचा जमाव जमला. दोन्ही बाजूंनी तणाव निर्माण झाला.

ही राजकीय पदाधिकाऱ्यांनी वादात उडी घेतल्याने वातावरण आणखीनच चिघळण्यास सुरुवात झाली. ही बाब कळताच सहायक पोलीस आयुक्त सुदर्शन पाटील, संपत शिंदे यांच्यासह सिटीचौक पोलीस ठाणे, गुन्हे शाखेच्या अधिकाऱ्यांनी घटनास्थळी धाव घेतली. मारहाणीत जखमी दोन्ही तरुणांना घाटी रुग्णालयात दाखल केले. पोलिसांनी वेळीच घटनास्थळी येऊन कारवाई करत जमाव पांगवल्याने परिस्थिती नियंत्रणात आली. या ठिकाणी क्‍यूआरटी पथक, दंगा काबू पथक आणि राज्‍य राखीव दलाची तुकडी तैनात करण्यात आली.